မိုးမခမှာ ဖော်ပြခဲ့တဲ့ ဆောင်းပါး ၆ ခုကို ပေါင်းပြီး ပြန်လည် ဝေမျှခြင်း ဖြစ်ပါတယ်။
အင်္ဂလန်ခရီး မပြီးသေးပါ ၁
အရှင်ဉာဏိက
ဇွန် ၈၊ ၂၀၀၉
သိမ်းမြစ်၊ London Eye နောက်ခံနဲ့ အရှင်ဉာဏိက ၊ ရွှေမင်းဝံဆရာတော် ၊ မောင်မိုးကျော်
နောက်ပြီး ခုကိုယ့် ခရီးစဉ်ကို နှောင့်နှေးကြန့်ကြာအောင်လုပ်တဲ့သူတွေနေထိုင်တဲ့ မဟာနိုင်ငံတော်ကြီးရဲ့ အထင်ကရ မြို့တော်ကြီးလဲ ဖြစ်သပေါ့လေ။ ထည်ဝါခမ်းနားမှုတွေ၊ မြင့်မြတ်ကြီးကျယ်မှုတွေ တပုံတပင်နဲ့ ဣနြေ္ဒကြီးမားစွာ ဝင့်ဝါခဲ့ဘူးတာ။ ခု တော့လဲ အင်္ဂလိပ်တို့ရဲ့ ခမ်းနားထည်ဝါမှုတွေကို ရာဇဝင်ထဲမှာ ထားရစ်ခဲ့ပါပြီ။ ခေတ်သစ်လူမှုဘဝကို ဖွံ့ဖြိုးပြီးနိုင်ငံ ကြီးပီပီ အမီလိုက်ကာ (အဲ) ဦးဆောင်ကာ ကမ္ဘာကြီးကို အပေါ်စီးကနေ ဟန်ပါပါကြည့်ရင်း ဣနြေ္ဒကြီးကြီးနဲ့ ရပ် တည်လို့ နေသပေါ့။ သို့ပေမယ့် ဟိုးငယ်ငယ်ကတည်းက ကြားဘူးနားဝရှိလွန်းလှတဲ့ အင်္ဂလိပ်တို့ရဲ့ မြို့တော်ကြီး လန်ဒန်ဆိုတာကို ရာဇဝင်ထဲမှာ ကိုယ်က မထားရစ်ခဲ့နိုင်သေးဘူးလေ။ ဒီတော့ အခွင့်သာတာနဲ့ အလည်သွားဖို့ စိတ်ကူးရှိခဲ့တာ။ ဟိုးရှေးရှေး အနုလက်ရာတွေကို တတသသ ခံစားရှုမြင်ချင်နေခဲ့တာ။ ခုတော့ ဒီစိတ်ကူးအိပ်မက်ကို တကယ်အကောင်အထည်ဖော်နိုင်ခဲ့ပြီလို့ ဆိုရမှာပေါ့။ ဒါပေမယ့် ကိုယ့်အိပ်မက်ကို လှပစွာ မက်ခဲ့ရတာတော့လည်း မဟုတ်ပါဘူး။
ကိုယ်တို့ဒီနေ့ (ဇွန်လ ၂ ရက်၊ ၂ဝဝ၉၊ အင်္ဂါနေ့) နံနက်မှာပဲ လန်ဒန်ကိုရောက်တယ်။ ကြည့်စမ်း။ လန်ဒန်သွားဖို့ ဗီ ဇာက သောကြာနေ့ကမှရတာ။ အကျိုးဆောင်ပေးသူက လော့စ်အင်ဂျလိစ်ကနေ ကိုယ်သွားစောင့်နေတဲ့ မေရီလင်း ပြည်နယ်မှာရှိတဲ့ မင်္ဂလာရာမကျောင်းကို အမြန်ပို့ပေးလိုက်တာ။ စနေနေ့မှ ကိုယ့်လက်ထဲရောက်တယ်။ တကယ် လို့သာ ကိုယ်သွားမယ့်ခရီးစဉ်က အရေးကြီးခရီးစဉ်တစ်ခုဖြစ်နေမယ်၊ မဖြစ်မနေ သွားရမယ့်ခရီးစဉ်ဖြစ်နေမယ်ဆိုရင် ဘယ်လောက်ဗီဇာအတွက် စိတ်ပူပင်မှုဖြစ်ရမလဲ။ စဉ်းစားကြည့်ပေါ့။ ခုတော့ ကိုယ်သွားမယ့်ခရီးစဉ်က မဖြစ်မနေ မဟုတ်သလို အရေးတကြီးလည်းမဟုတ်လို့ ကိုယ့်အတွက် ပူပန်မှုကို မဖြစ်စေခဲ့ပါဘူး။ ဒါပေမယ့် ပထမအကြိမ် ဗီဇာ ပေးဖို့ ငြင်းပယ်ပြီးကာမှ ဒုတိယအကြိမ်ထပ်ပြီး ကြိုးစားအားထုတ်လိုက်ရတဲ့အတွက် ကသီလင်တ ဖြစ်ခဲ့ရတာအမှန်။ အပိုအကုန်အကျလည်း များခဲ့ရတယ်။ အင်္ဂလိပ်တွေက ဒီနေရာမှာတော့ ကြီးကျယ်နေဆဲ။
အင်တာနက်မှာတင်ထားတဲ့ အင်ဖော်မေးရှင်းကို ယုံစားအားကိုးပြီး ဗီဇာလျှောက်တဲ့အလုပ်ကိုလုပ်ခဲ့တဲ့ ကိုယ့်အ တွက်တော့ မှတ်သားလောက်တဲ့သင်ခန်းစာပေါ့။ ကိုယ့်အဖြစ်အပျက်ပြောပြတော့ ကိုယ့်လိုပဲ ဝက်ဘ်ဆိုက်ကြည့်ပြီး လျှောက်ခဲ့လို့ အလားတူကြုံခဲ့ရတဲ့ ဒကာတစ်ဦးလဲရှိလို့ ဘဝတူလူသားတွေလည်းရှိသားလို့ သိလိုက်ရပါတယ်။ တကယ်တော့ သူတို့ဝက်ဘ်ဆိုက်မှာ ဘာတွေ ဘာတွေလိုအပ်ပါတယ်လို့ အတိအကျပြည့်ပြည့်စုံစုံ ပြောမထားပဲ ငြင်းပယ်ကာမှ ဒါတွေ ဒါတွေလိုအပ်ပါတယ်လို့ အကြောင်းပြတာမျိုးကတော့ သံရုံးတွေရဲ့ ဆိုးရွားလှတဲ့ ညံ့ဖျင်းမှု တစ် ခုလို့ပဲ ဆိုရမှာပေါ့။ ဒုတိယအကြိမ်ကြိုးစားရာမှာတော့ လမ်းကြောင်းကောင်းကောင်း သိသူနဲ့သွားလိုက်လို့ ဗီဇာရဖို့ တစ်ရက်ပဲကြာတယ်။ ဒါလည်း အံ့သြရမည့် အချက်ပါပဲ။ ရှိပါစေ။ နေရာတိုင်းမှာ သွားဖို့လမ်းရှိတာ ဓမ္မတာပဲဟာ။
ခုတော့ ကိုယ်အင်္ဂလန်ကိုရောက်နေပြီ။ပြောခဲ့သလို အမေရိကကနေ ထွက်ခါနီးမှာမှ အင်္ဂလန်ဗီဇာက ကပ်ရတာမို့ ဥရောပနိုင်ငံတွေကိုသွားဖို့ ရှန်းဂန်ဗီဇာလျှောက်ဖို့ အချိန်မရခဲ့ဘူး။ ဒါကြောင့် ဒီအင်္ဂလန်ကနေပဲ “ရှန်းဂန်” ဗီဇာ လျှောက်ရတော့မယ်။ ရလျင်လည်းရ၊ မရလျင်လည်း နေပစေတော့။ သူတို့ဥပဒေအရဆိုလျင်တော့ ကိုယ်နေထိုင်တဲ့ နေရာကနေ လျှောက်ခဲ့ရမယ်တဲ့။ အင်္ဂလန်ကလျှောက်မယ်ဆိုလျင် အင်္ဂလန်မှာ နေထိုင်သူဖြစ်ဖို့ လိုတယ်တဲ့။ ဒီ အတိုင်းဆို “ရှန်းဂန်” ဗီဇာရဖို့ လွယ်မယ်မထင်ဘူး။ (သင့်မှာ နည်းလမ်းကောင်းလေးများရှိလျင်လည်း ပြောပြပါဦး)။ ဥရောပနိုင်ငံတွေသွားဖို့ ဗီဇာမရလျင်တော့ စကော့တလန်၊ အိုင်ယာလန်၊ ဝေလစတဲ့ ဂရိတ်ဗြိတိန်ဝင် ဒေသများဆီသို့ပဲ လေ့လာရေးခရီးဆက်ရမှာပေါ့။ အိုင်းရစ်နဲ့ စကော့တို့ရဲ့ ရှေးရိုးကျပေမယ့် လှပတဲ့ယဉ်ကျေးမှုများကလည်း စွဲ မက်တသဖွယ် ဖြစ်နိုင်မှာပါ။ ကံကောင်းလျင်ဖြင့် အိုင်းရစ်တွေရဲ့ ပုလွေသံချိုချိုကိုလည်း ရင်ဖိုစွာနားထောင်ခွင့် ရလျင်ရဦးမှာ။ ဒါဆိုဘယ်လောက် ကြည်နူးဖွယ်ခရီးဖြစ်မှာလဲ။ ဟုတ်ဘူးလား။ အရာအားလုံးဟာ လှပတဲ့အရာချည်းသာ ပါ။ သို့ပေမယ် ရောင့်ရဲတတ်စွာနဲ့ သင့်တင့်စွာ နှလုံးသွင်းတတ်ဖို့တော့ လိုတာပေါ့။ ရောင့်ရဲမှုဆိုတာ ပျင်းရိမှုနဲ့ လုံးဝ မတူဘူးဆိုတာနဲ့ သင့်တင့်စွာ နှလုံးသွင်းခြင်းဆိုတာလဲ ညံ့ဖျင်းခြင်းအတွက် ဆင်ခြေပေးတဲ့နေရာမှာ သုံးရအောင် ညွှန်ပြထားတာ မဟုတ်ဘူးလို့ နားလည်ဖို့လဲ လိုလိမ့်မယ်။
ပြောရဦးမယ်။ ကိုယ်နဲ့အင်္ဂလန်နဲ့ကလည်း သိပ်ပြီးလမိုင်းကပ်ပုံ မရဘူး။ တကယ်ဆို ဝါရှင်တန်ဒီစီ ဒါးလပ်စ်လေဆိပ် ကနေ ကိုယ်တို့စီနင်းလိုက်ပါမည့်လေယာဉ်က ဇွန်လ ၁ ရက်နေ့ မနက် ၉နာရီ ၂ဝ မိနစ်မှာထွက်မှာ။ ဒါပေမယ့် အေး ဂျင့်တွေက အဲဒီလေယာဉ်အတွက် လက်မှတ်တွေကို ပိုရောင်းထားတယ်။ ဒါကြောင့် ထိုင်ခုံနံပါတ်မရှိသေးသူတွေ အတွက် ဒီလေယာဉ်နဲ့လိုက်ရဖို့ မသေချာဘူးဖြစ်နေတယ်။ ဒီအကြောင်း ဂိတ်ပေါက်မှာရှိတဲ့ ဝန်ထမ်းတဦးက ကြေညာတယ်။ တကယ်လို့ ထိုင်ခုံနံပါတ်ရှိပြီးသားသူတွေထဲက မလိုက်ဖြစ်တဲ့သူတွေရှိလျင် ကျန်နေသူတွေကို နံပါတ်စဉ် အတိုင်းခေါ်သွားမယ်တဲ့။ ကြည့်လိုက်စမ်းပါဦး။ ကိုယ့်နံပါတ်က ၂၅ ။ ဒီတော့ ထိုင်ခုံနံပါတ်ရှိပြီးသားသူ ၂၄ ယောက် မလာပါမှ ကိုယ့်အလှည့်ရောက်မှာ။ ဘယ်လိုလုပ် ၂၄ ယောက်ပျက်ကွက်ဖို့ ဖြစ်နိုင်ပါ့မလဲ။ ဒီအချိန်က အားလပ်ရက်၊ ခရီးသွားရာသီပဲဟာ။ ဒီတော့သေချာပါတယ်။ ဒီလေယာဉ်နဲ့ ကိုယ်လိုက်ရဖို့ လုံးဝဖြစ်နိုင်မှာ မဟုတ်ပါဘူး။
လေယာဉ်ထိုင်ခုံမရှိသူတွေထဲမှာ ဘာဖြစ်လို့ ကိုယ့်နံပါတ်က ခုလောက်ထိအောင် နောက်ကျသွားရတာလဲ။ ကိုယ့် လေယာဉ်လက်မှတ်ဝယ်ထားတာကပဲ နှစ်လနီးပါးရှိနေပြီ။ အချိန်အတိုင်းအတာအရ ဘယ်နည်းနဲ့မှ ခုလောက် နောက်ရောက်စရာ အကြောင်းမရှိနိုင်ဘူး။ ဒီတော့သူတို့အကြောင်းပြချက်က အမြဲတမ်းခရီးသွားနေသူတွေ၊ သူတို့ လေကြောင်းနဲ့ ခရီးသွားများသူတွေကို ဦးစားပေးထားတဲ့ အစီအစဉ်အရ ခုလိုတခါတလေမှသာ ခရီးသွားတဲ့ကိုယ် တို့က နောက်ရောက်သွားရတာပါတဲ့။ သူတို့ဦးစားပေးစာရင်းပါဖို့ ကိုယ်ကပဲ ခရီးအမြဲသွားနေရမည့်ပုံ။ အဲပေါ့လေ။ ကိုယ်ဆိုတဲ့ကိုယ်ကလဲ ဘယ်နေရာမှာမှ ဦးစားပေးစာရင်းထဲမှာ မပါဝင်တဲ့သူမျိုးဆိုတော့လည်း ခုလိုနောက်ကျန်သူ၊ နောက်ချန်ခံရသူ ဖြစ်တာတော့လည်း အဆန်းမဟုတ်လှပါဘူး။ ဒီလိုဖြစ်ရတာကိုက ကံထူးခြင်းတစ်မျိုးပဲ မဟုတ်လား။ သေမင်းက သူ့ဦးစားပေးစာရင်းပါသူတွေတံခါးကို လျောက်ခေါက်တဲ့အခါမှာလည်း ကိုယ့်တံခါးပါဝင်နိုင်မယ် မဟုတ် ဘူးဆိုတာကိုလည်း ကိုယ်ကတော့ ယုံကြည်နေမိပါတယ်။
လေဆိပ်ကောင်တာရောက်ခါနီးမှာ ဝါရှင်တန်ဒီစီအနီးမှာနေထိုင်တဲ့ ဒေါက်တာချစ်ခင်ဝေက အကျိုးအကြောင်း ဖုန်း လှန်းဆက်ရင်း အစစအဆင်ပြေမှာပါလို့ ပြောတယ်။ ဒီတော့ ကိုယ်က ပြေမယ်ဆိုတာ မသေချာသေးပါဘူးလို့ ပြော လိုက်တယ်။ ခုလိုလေယယာဉ်ပေါ် တက်ခါနီးနေတာတောင် မသေချာသေးဘူးဆိုတော့ မသေချာစရာ ဘာများရှိသေး လဲလို့ သူကထပ်မေးတယ်။အဲဒီတုံးက ဘာရယ်လို့ တိတိကျကျ အကြောင်းမပြနိုင်ခဲ့ဘူး။ ဟော ခုတော့ တိတိ ကျကျ ပြောနိုင်ပါပြီ။ လေယာဉ်တက်ခါနီးတာတောင် မသေချာသေးတာကတော့ မနက်ခင်းထွက်မယ့်လေယာဉ်နဲ့ မလိုက်ပါ နိုင်ခဲ့တဲ့အတွက် ညနေ ၅ နာရီ ၃ဝ မှထွက်တဲ့ လေယာဉ်နဲ့မှ လန်ဒန်ကို ထွက်ခွါလာနိုင်ခဲ့တယ်လို့ ဆိုတာပါပဲ။ ဒီတော့ ဝါရှင်တန်ဒီစီ ဒါးလပ်လေဆိပ်ထဲမှာ တနေ့တာ အချိန်ဖြုန်းလိုက်ရပါတယ်။ အဲဒီလိုပါဆို။ ကံကြမ္မာက ကိုယ့် အတွက်များဆို နောက်ချန်ထားဖြစ်အောင်ကို ချန်ထားလိုက်သေးတယ်။
လေကြောင်းလိုင်းက နစ်နာကြေးအတွက် လေယာဉ်လက်မှတ်ခ တဝက်ပြန်ပေးတယ်။ ခရီးသွားဖို့ ပျက်ကွက်သူတွေ များလို့ လက်မှတ် “ကင်ဆယ်လ်”လုပ်သူတွေများတာကြောင့် လက်မှတ်တွေ ခုလိုပိုရောင်းရတာပါတဲ့။ ဝမ်းနည်းပါတယ် ပေါ့။ ကိုယ့်လို အရေးတကြီးခရီးသွားသူ မဟုတ်သူတွက် သူတို့ပေးတဲ့အကြောင်းခိုင်လုံပေမယ့် အရေးတကြီး ခရီး သွားတွေအတွက်တော့ လုံးဝကျေနပ်နိုင်မယ် မဟုတ်ပါဘူး။ ခရီးသည်ထဲက အချို့ကဆို စိတ်ဆိုးမာန်ဆိုးနဲ့ လက်မှတ် ကောင်တာကသူတွေကို ရန်တွေ့နေလေရဲ့။ ဒီလိုဖြစ်တာ သူတို့နဲ့တိုက်ရိုက် မပတ်သက်ပေမယ့် ရန်တွေ့စရာ အနီး ဆုံးက သူတို့ဆိုတော့လည်း နီးရာသူက ခံကြရတာပေါ့။ ခရီးသွားတွေဖက်က စဉ်းစားတော့လည်း ရန်တွေ့ချင်စရာလေ။ သူတို့မှာပါလာတဲ့ အိတ်တွေက ထွက်ခွါသွားတဲ့လေယာဉ်ပေါ်မှာ ပါသွားပြီ။ လူက မလိုက်နိုင်သေး။ ဒီတော့ ပါသွားတဲ့အိတ်တွေက ဘယ်သောင်တင်လို့ ဘယ်ကမ်းဆိုက်လေဦးမယ် မသိ။ ဒီအိတ်ပျောက်တဲ့အတွေ့အကြုံမျိုးကို ကိုယ်က လက်တွေ့ခံစားဘူးပြီ။ ဘယ်မေးလို့ ဘယ်စမ်းရမယ် မသိ။ ဘယ်သူမှလည်း တိကျတဲ့အဖြေ ပေးနိုင်တာမျိုး မဟုတ်။ ဒီတစ်ခါ ခရီးသွားရာမှာ ဘာအိတ်မှ အပိုမပါဘဲ တနိုင်လက်ဆွဲအိတ်လေးတစ်လုံးနဲ့ ခရီးထွက်ခဲ့လို့သာ ကိုယ်လဲ သူတို့လို မဖြစ်တာ။ သူတို့လို အပူ မထိတာ။ ဒီတော့ ဝန်ကျဉ်းမှုက ဝန်ကင်းချမ်းသာကို သယ်ဆောင်လာခဲ့ တယ်လို့ဆိုရမှာပေါ့။
လန်ဒန် ဟီသရိုးလေဆိပ်ကိုလေယာဉ်ဆိုက်တော့ နေသာနေလေရဲ့။ အချိန်က နံနက် ၆ နာရီခန့်။ လန်ဒန်မှာ ခုလို နေသာတဲ့ အချိန်တွေ့ရတာ လဘ်တစ်ပါးတဲ့။ ဒါဆို အင်္ဂလန်မြေ စနင်းတာနဲ့ ကောင်းတဲ့လာဘ်တစ်ပါးကို စတင် ထိတွေ့လိုက်ရတယ်လို့ ဆိုရမှာပေါ့။ ရှေ့မှာ ဒီထက်ဒီထက် ကောင်းတဲ့လာဘ်တွေ ဘယ်လောက် လာဦးမလဲ။ စောင့် ကြည့်ရသေးတာပေါ့။ ခုမှ အစပဲရှိသေးတာ။ အင်္ဂလန်ခရီးက ပြီးမှ မပြီးသေးတာပဲလေ။
မေတ္တာဖြင့် …
အင်္ဂလန်ခရီး မပြီးသေးပါ (၂)
အရှင်ဉာဏိက
ဇွန်လ ၂၂၊ ၂ဝဝ၉
အင်္ဂလန်အင်မီဂရေးရှင်းအရာရှိက ထွေထွေထူးထူး မမေးပါဘူး။ ဘာရည်ရွက်ချက်နဲ့လာတယ်၊ ဘယ်လောက်ကြာမယ်၊ ဘယ်မှာတည်းခိုမယ် စကားသုံးခွန်းလောက်ပါပဲ။ ပြီးတော့ ပတ်စ်ပို့မှာ အဝင်ရက်စွဲ ထုပေးလိုက်တယ်။ အိုကေပါပဲ။ လေယာဉ်ပေါ်ပါ ခရီးသည်အားလုံးနီးပါး ဘာပစ္စည်းမှ အထူးမပါကြလို့လားတော့ မသိဘူး။ ပစ္စည်းရှာဖွေရေးဂိတ်ကိုတောင် မဖြတ်ကြဘဲ ဆိုင်ရာအပေါက်အသီးသီးကို လွယ်လွယ်ကူကူပဲ ထွက်ခွာသွားကြတာကို အမှတ်ပြုမိတယ်။ အာရှဘက်သွားကြတဲ့ ခရီးသည်အများစုဆိုလျှင်တော့ ဆိုင်ရာဒေသရှိ ဆွေမျိုးဉာတိတွေအတွက် ပစ္စည်းတွေ တနင့်တပိုး သယ်တတ်ကြရတာကို တွေ့ဖူးနေခဲ့တာ။ ဒီဘက်မှာတော့ ဒီဝန်မျိုး မရှိဘူးလို့ပဲ မှတ်ယူရမှာပေါ့။ ကိုယ်တို့မှာလည်း ဘာမှအထူးမပါတော့ လာကြိုမယ့်သူတွေရှိရာကို တိုက်ရိုက်ပဲသွားခဲ့ကြတယ်။
ဧည့်ကြိုနေရာမှာတော့ လန်ဒန်ရောက် ဆရာတော်တွေဖြစ်တဲ့ ဆရာတော်ဦးကုသလ၊ ဦးဝိသုတနဲ့ ဦးတောသနတို့ လာရောက်ကြိုဆိုကြတယ်။ ရွှေမင်းဝံဆရာတော်နဲ့ သူတို့အားလုံးနဲ့ကလည်း ရင်းနှီးဖူးပြီးသား။ သုံးပါးလုံးက လန်ဒန်အနောက်ပိုင်းရှိ လန်ဒန်ဝိဟာရမှာ သီတင်းသုံးနေကြတယ်။ ဆရာတော်သုံးပါးစလုံးက ကိုယ်နေထိုင်ရာ ဆန်ဖရန်ဝန်းကျင်ရှိ ဖရီးမောင့်မြို့က မေတ္တာနန္ဒဝိဟာရကို ရောက်ဖူးကြလို့ အားလုံးနဲ့က သိကျွမ်းပြီးသား။ အဆင်သင့်လျှင် လန်ဒန်ကို အလည်လာဖို့ ဖိတ်ခေါ်တတ်ကြတာ။ ခုတော့ လန်ဒန်ကို တကယ်ရောက်လာနိုင်ပြီ။
ဟီသရိုးလေဆိပ်က ထွက်တာနဲ့ ထူးထူးခြားခြား အမှတ်ပြုမိလိုက်တာတွေရှိတယ်။ လေဆိပ်အထွက်မှာ တွေ့လိုက်ရတဲ့ ဂျက်လေယာဉ်ငယ်လောက်ခန့်ရှိ လေယာဉ်ပုံစံတစ်ခုနဲ့ ကြော်ငြာ။ လေယာဉ်ကိုယ်ထည်ပေါ်မှာEmirates ဆိုတဲ့ စာတမ်းထိုးလို့။ ဆော်ဒီလေကြောင်းလိုင်းရဲ့ ကြော်ငြာတစ်ခုပါ။ အရှေ့အလယ်ပိုင်းဒေသရဲ့ စီးပွားရေးအင်အား ကြီးထွားလာမှု သင်္ကေတတစ်ခုများလားလို့ တွေးထင်မိတယ်။ ဂရိတ်ဗြိတိန်ဆိုတော့ လန်ဒန်မှာ အရာအားလုံးဟာ ခန့်ခန့်ထည်ထည် ကြီးကြီးမားမားကြီးတွေ၊ ရှေးဟောင်းဆန်ဆန်တွေပဲဖြစ်မယ်လို့ ထင်ထားခဲ့တာ။ ခုမြင်ရတဲ့ လန်ဒန်ကတော့ ကိုယ်တွေ့မြင်နေကျ အမေရိကန်ပြည်ထောင်စုရှိ အဆောက်အဦများလိုပါပဲ။ အရောင်အဆင်းလည်း မထူးခြားလှ။ ပုံသဏ္ဌာန်လည်း ဆင်တူရိုးမှား။ အုတ်ကြွပ်မိုးများရဲ့ နွမ်းလျလျ နီညိုရောင်ကလွဲလျှင်ပေါ့။ မြင်မြင်သမျှက သစ်သစ်လွင်လွင်။ သို့ပေမယ့် ထူးခြားတာက လမ်းတွေ ပိုကျဉ်းနေတာရယ်၊ ကားတွေ ပိုသေးနေတာရယ်၊ တိုက်တာ အဆောက်အဦတွေက ပိုနိမ့်နေတာရယ်ပါပဲ။ နောက်ပြီး လက်ဝဲကပ်မောင်းစနစ်ကလည်း လမ်းပြောင်းပြန်မောင်းတဲ့ ကားကို စီးနေရသလို ခံစားမိပြန်တယ်။ ကိုယ်သာ ကားမောင်းရလျှင် ဘယ်ညာမှားပြီး ယောင်ချာချာဖြစ်နေမှာ။ လမ်းတလျှောက် အချို့နေရာများမှာတော့ ရှေးဟောင်းအရိပ်အငွေ့တော်တော်များများကို ပိုပိုတွေ့လာရတယ်။ လန်ဒန်မြို့လယ်မှာ ဆိုလျှင်တော့ ဒီထက်ခမ်းနားထည်ဝါတဲ့ ရှေးဟောင်းလက်ရာတွေကို တွေ့ရလိမ့်မယ်လို့လည်း မျှော်လင့်မိပါတယ်။
လေယာဉ်ကွင်းကနေ တည်းခိုရာကျောင်းကိုရောက်ဖို့ နာရီဝက်လောက် ကားမောင်းရတယ်။ လန်ဒန်ဝိဟာရ ကျောင်းက ပြန်လည်ချဲ့ထွင် ပြုပြင်နေဆဲ။ ရှေးဟောင်းပုံစံပေါ်မှာ ခေတ်ပေါ်ပစ္စည်းတွေနဲ့ ခန့်ခန့်ထည်ထည်။ မပြီးပြတ်သေးတဲ့အရာတွေအတွက် အပြီးသတ်နေဆဲ။ လန်ဒန်မြို့လိုနေရာမှာ ခုလောက်ကျယ်ပြန့်တဲ့ အဆောက်အဦနဲ့ ကျောင်းမျိုးက မြန်မာ့အတိုင်းအတာနဲ့ဆို ဂုဏ်ယူစရာ။ အရုဏ်ဆွမ်းအတွက် မန္တလေးနန်းကြီးသုတ်က အဆင်သင့်။ နန်းကြီးက ကိုယ့်အကြိုက်။ ဒါလည်းပဲ လာဘ်ကောင်းခြင်းတစ်မျိုး။ ဟုတ်တယ်လေ။ မတော်လို့ မုန့်ဟင်းခါးနဲ့များ အရုဏ်ဆွမ်း ဆက်ကပ်ခဲ့လျှင် ဒီလန်ဒန်ဟာ ဘယ်လိုလုပ် ကိုယ့်အတွက် မင်္ဂလာရှိစွာ ကြိုဆိုမှုဖြစ်နိုင်မှာလဲ။ လန်ဒန်ရာသီက အေးတယ်ဆိုရုံမျှ။ လေပြည်လေးက သွေးရုံမျှ။ နေခြည်လေးက ရှိန်းမြမြ။ နေထိုင်ကောင်းမွန် မျှတစွ။ သာယာလှတဲ့ ချိန်ခါသမယ။
နေ့လယ်စာစားပြီး လန်ဒန်မြို့ထဲကို ထွက်ခဲ့ကြတယ်။ ပထမ ဘတ်စ်ကားစီး။ လန်ဒန်ဘတ်စ်ကားတွေက အနီရောင် နှစ်ထပ်ကားကြီးတွေ။ မြင့်မြင့်ထောင်ထောင်နဲ့။ ဘတ်စ်ကားကြီးတွေက ရှေ့တည့်တည့်ကကြည့်ရင် ပါးလွှာလွှာ လှီးထားတဲ့ ပေါင်မုန့်ချပ်ကြီးတွေအလား ထင်ရတယ်။ ကြည့်ကြည့်လေရာ နေရာအနှံ့။ လမ်းကျဉ်း လမ်းသွယ်၊ နေရာတကာ ကားနဲ့လမ်းအကျယ်အဝန်းက မဆန့်တရံ့။ သူတို့မို့ ကျဉ်းကျဉ်းကျပ်ကျပ်ထဲ မောင်းရဲတယ်။ ဘတ်စ်ကားက ဆင်း၊ ရထား ပြောင်းစီးရတယ်။ ရထားဘူတာက ဝင်ဘလေ ပါ့ခ်။ ဝင်ဘလေကတော့ ကိုယ်နဲ့သိပ်မစိမ်းတဲ့နာမည်။ ကိုယ်တင်မဟုတ်ပါဘူး။ အားကစားနဲ့ မစိမ်းတဲ့ ကမ္ဘာအရပ်ရပ်ကလူတိုင်း အင်္ဂလန်နိုင်ငံရဲ့ အမျိုးသားအားကစားကွင်းကြီး ဝင်ဘလေဆိုတာကို ကြားဖူးမှာပါ။ ဒီကွင်းကြီးမှာပဲ ကမ္ဘာကျော် အားကစားအမျိုးမျိုးကို ကျင်းပလေ့ရှိတယ် မဟုတ်လား။ ဝင်ဘလေဘူတာက ဝင်ဘလေ အားကစားကွင်းကြီးနဲ့ မျက်နှာချင်းဆိုင် လမ်းတဖက် မလှမ်းမကမ်းမှာ။ ဘူတာကနေကြည့်လိုက်လျှင် ဘီးခုံးကြီးတစ်ခု အပေါ်ကနေ တင်ထားသလိုဖြစ်နေတဲ့ ဝင်ဘလေကွင်းကြီးက ခန့်ခန့်ထည်ထည်။ မပြန်ခင်မှာ ဝင်ဘလေကွင်းကြီး နောက်ခံပြုကာ အမှတ်တရ ဓာတ်ပုံရိုက်ဦးမယ်။ ကမ္ဘာကျော် အားကစားသမားတွေ ခြေချချင်ကြ၊ ခြေချကြတဲ့နေရာ။ ရွာတောင်မကျော်တဲ့ အားကစားဝါသနာရှင်တစ်ယောက်လည်း ဒီနေရာကို ရောက်ခဲ့ပါကြောင်း ဝင်ဘလေစောင့်နတ်မင်းတွေ အပျင်းပြေ မှတ်တမ်းပြုနိုင်အောင်ပေါ့။
လန်ဒန်ဝိဟာရက ထွက်စကတည်းက လမ်းထိပ်က စတိုးဆိုင်မှာ တနေ့တာအတွက် လက်မှတ်ဝယ်ခဲ့တယ်။ ရှိပြီးသား (Oyster card) ခေါ်တဲ့ လက်မှတ်ဟောင်းပေါ်မှာ တနေ့တာအတွက် ဘတ်စ်ကားနဲ့ ရထားပါ အတူတွဲသုံးနိုင်အောင် ငွေပေါင်းထည့်ရတဲ့ လက်မှတ်မျိုး။ ဒါကို Top-up လုပ်တယ်လို့ခေါ်တယ်။ ဘာကြောင့် ဒီလိုခေါ်တယ်တော့ မသိဘူး။ ကားတို့ ရထားတို့ တက်ရာမှာ ဝင်ပေါက်မှာရှိတဲ့ ကတ်ဖတ်စက်ပေါ်မှာ ဒီကတ်လေးကိုအပေါ်ကနေ တင်လိုက်ရတာကြောင့် ခုလို ခေါ်တာလည်းပဲ ဖြစ်နိုင်မယ်။ တနေ့တာအတွက် ငါးပေါင်နဲ့ ပြားရှစ်ဆယ် ပေးရတယ်။ လန်ဒန်တမြို့လုံးကို သွားလိုရာသွားနိုင်တာမို့ တနေ့တာအတွက် ခြောက်ပေါင်နီးပါးဆိုတာ ထိုက်တန်ပါတယ်။ ခုခါလိုဆီ ဈေးတွေ တက်နေတဲ့အခါမှာ ပိုပြီးတန်ပါတယ်လို့ ဆိုရမှာပါ။
နယူးယောက် မြေအောက်ရထားတွေနဲ့စာလျှင်တော့ လန်ဒန်မြေအောက်ရထားက ပိုမိုသန့်ရှင်းသစ်လွင်တောက်ပပါတယ်။ ဒါပေမယ့် ကိုယ်တွေ့ပြောရလျှင် စင်္ကာပူ MRT ကိုတော့ မမီသေး။ အေးပေါ့လေ၊ လန်ဒန်တို့ နယူးယောက်တို့ရဲ့ မြေအောက်ရထားစနစ်က ဟိုးလွန်ခဲ့တဲ့ နှစ်ပေါင်းများစွာကတည်းက ရှိနေခဲ့တာ။ နောက်ပြီးလည်း ရထားလမ်းကြောင်းတွေ၊ ရထားတွေဆိုတာကလည်း နှိုင်းယှဉ်မရအောင် ပိုမိုရှည်လျား များပြားတာ။ ဒီတော့ ပြုပြင်ဖို့၊ ထိန်းသိမ်းစောင့်ရှောက်ဖို့ကလည်း ပိုမိုခက်ခဲမယ်။ အကုန်အကျလည်း နှိုင်းမရအောင် များမှာပေါ့။ ဘာပဲဖြစ်ဖြစ်။ ဟောင်းနွမ်းမှုတွေကို ထိန်းသိမ်းတတ်တဲ့ လန်ဒန်မြို့တော်မှာ မြေအောက်ရထားများကတော့ သစ်လွင်တောက်ပမှုဘက် ကဲတယ်လို့တောင် ဆိုရမှာပါ။ ဝင်ဘလေဘူတာကနေ မိနစ် ၂ဝ လောက် မြေအောက်ရထားစီးပြီး ဝက်စ်မီနီစတာဘူတာမှာ ဆင်းရတယ်။
ဘူတာကနေ ထွက်လျှင်ထွက်ချင်း လွန်ခဲ့တဲ့နှစ်ပေါင်းများစွာကတည်းက အမြင်အကြားအရ ရင်းနှီးနေခဲ့ဖူးတဲ့ ဘစ်ဘင်းနာရီစင်ကြီးကို ရုတ်တရက်တွေ့လိုက်ရတယ်။ ခုမှ လန်ဒန်ကို တကယ်ရောက်နေပါလားလို့လည်း ရုတ်တရက် ခံစားမိလိုက်တယ်။ ဟုတ်တယ်။ အင်္ဂလန်နိုင်ငံရှိ သမိုင်းဝင်အရာများထဲမှာ ဘစ်ဘင်းနာရီကြီးက ကိုယ်နဲ့ရင်းနှီးအကျွမ်းဝင်ဆုံး။ အင်္ဂလန်လို့ ဆိုလိုက်တာနဲ့ ကိုယ့်စိတ်ထဲမှာ ပေါ်လာတတ်တာက ဒီဘစ်ဘင်းနာရီမျှော်စင်ကြီး။ ဒီတော့ ဒီနာရီစင်ကြီးကို တွေ့ရတော့ ကိုယ့်မိတ်ဆွေဟောင်းနဲ့ ပြန်တွေ့လိုက်ရသလို။ ဘစ်ဘင်းက ပုံတွေထဲမြင်ရတာထက် ပိုပြီး အနုပညာမြောက်တယ်၊ ခန့်ညားထည်ဝါတယ်လို့လည်း ထင်မိတယ်။ ဒါပေမယ့် အမေရိကမှာ ကြီးကြီးတွေ၊ မြင့်မြင့်အရာတွေနဲ့ ယဉ်ပါးနေတဲ့ ကိုယ့်မျက်စိအတွက် ဘစ်ဘင်းနာရီစဉ်ကြီးက ထင်ထားတာထက် အနည်းငယ်နိမ့်နေသလို ဖြစ်နေတယ်။
ဘစ်ဘင်းနဲ့တွဲလျက် တည်ရှိနေတဲ့ အင်္ဂလိပ်ပါလီမန်အဆောက်အဦကြီးကလည်း ရှေးဟောင်းအနုလက်ရာတွေ တပုံတပင်နဲ့ ဝင့်ထည်ခန့်ညားစွာ။ သိမ်းမြစ်ကမ်းခြေမှာ ဣနြေ္ဒကြီးစွာ ရပ်တည်လို့။ ပါလီမန်လမ်းမနဲ့ ဝက်စ်မီနီစတာတံတားပေါ်မှာတော့ နိုင်ငံတကာခရီးသွားများနဲ့ ပြည့်နှက်လျက်။ ကိုယ်လည်း နိုင်ငံတကာ ခရီးသွားဧည့်သည်တစ်ဦးပဲလေ။ ဘစ်ဘင်းနဲ့ ပါလီမန်ကို နောက်ခံပြုလို့ ဗီဒီယိုကင်မရာနဲ့ ဓာတ်ပုံကင်မရာ မှတ်တမ်းတင်သူများကြားမှာ ကိုယ့်အတွက် နေရာအားလေးတစ်နေရာရဖို့ ရှာဖွေရတော့တာပဲပေါ့။ ကိုယ်လည်း ဘိလပ်ပြန်တစ်ဦးပါလို့ တကယ်လို့ နောင်တချိန်မှာ ဂုဏ်ယူဝင့်ကြွားလိုစိတ် ဖြစ်လာမယ်ဆိုရင် အခိုင်အမာ သက်သေပြစရာ ကိုယ့်အတွက် ဒါအခွင့်ကောင်းပဲ မဟုတ်လား။
အင်္ဂလန်နဲ့ လန်ဒန်ရဲ့ သင်္ကေတတွေဖြစ်တဲ့ ဘစ်ဘင်းနာရီစင်ကြီးရယ်၊ နာရီစင်ရှေ့ ဝက်မီနီစတာလမ်းပေါ်မှာ ပြေးလွှားနေတဲ့ Route master ဆိုတဲ့ အနီရောင် နှစ်ထပ်ဘတ်စ်ကားကြီးများနဲ့ Black Cabs ဆိုတဲ့ အနက်ရောင် တက္ကစီ ဆလွန်းကားများရယ်ကို တပါတည်းပါနိုင်အောင် စောင့်ပြီးဓာတ်ပုံရိုက်ဦးမယ်။ သစ်ရွက်တွေလည်းကြွေ၊ စနိုးတွေလည်းကျ၊ မှုန်ပျပျရာသီဥတုကြားက ဘစ်ဘင်းနာရီစင်ကြီးနဲ့ ပါလီမန်အဆောက်အဦပေါ်ကနေ မီးရောင်လေးတွေ လက်လက်ပြေးနေတဲ့ သိမ်းမြစ်ပြင်အလှကိုလည်း မျှော်ငေးတသ နေချင်မိသေးတာ။ ခုတော့ အချိန်မကျသေး။
ကိုယ်ဟာ သာမန်ခရီးသွားဧည့်သည်သက်သက် တစ်ဦးသာပါ။ ဘာရယ်လို့ ရေရာစွာမရှိတဲ့ ခရီးတစ်ခုကို သွားနေသူပါ။ ‘ဘယ်နေရာရယ်လို့ အတိအကျ မသိနိုင်တဲ့ခရီးကို သွားနေခြင်းဟာ အကောင်းဆုံးအချိန်ကို သုံးစွဲနေခြင်းပါ’ တဲ့။ လန်ဒန်မြေအောက်ရထား ဘူတာတစ်ခုမှာ ကြော်ငြာစာတမ်းတစ်ခု ထိုးထားတယ်။ ကိုယ်ကလည်း အကောင်းဆုံး ခရီးသွားနေသူ သက်သက်ပဲဖြစ်ချင်သူ တစ်ဦးမဟုတ်လား။ ဒီတော့ သူ့ကြော်ငြာစာတန်းက ကိုယ့်အတွက်မဟုတ်လျှင်တောင် ကိုယ့်အကြိုက်နဲ့တော့ ကိုက်နေတာအမှန်။ ဘယ်လိုလဲ။ သင်ကရော ဘယ်လိုရည်ရွယ်မျိုးနဲ့ ခရီးသွားချင်သူလဲ။ အချိန်ရလျှင် ကိုယ့်ကိုပြောပြပါဦး။ ။
မေတ္တာဖြင့်
အင်္ဂလန်ခရီး မပြီးသေးပါ - ၃
အရှင်ဉာဏိက
ဇူလိုင် ၁၁ ရက် ၊ ၂ဝဝ၉
ကိုယ်ကတော့ လန်ဒန်သိမ်းမြစ်ထက် ကိုယ့်အမိနိုင်ငံက ဧရာဝတီရဲ့ အလှက အဆရာထောင်က သာလွန်တယ် လို့ ထင်မိတယ်။ ကိုယ်ဖြတ်ခဲ့ဘူးတဲ့ ဧရာဝတီရဲ့ အစိတ်အပိုင်းတိုင်းရဲ့အလှက သိမ်းမြစ်ရဲ့ ခုမြင်ရတဲ့ မြင်ကွင်းအလှထက် ပိုမိုတယ် ထင်မိတယ်။ ဒါဟာသဘာဝကိုချစ်တဲ့ ကိုယ့်ရဲ့မူလစိတ်ကြောင့်လည်း ဖြစ်နိုင်သလို ကိုယ့်ငါးချဉ်မို့ ကိုယ်ချဉ်တဲ့ ဇာတိစိတ်ကြောင့်လည်း ဖြစ်နိုင်တယ်။ နောက်ပြီး ဧရာဝတီရဲ့ သမိုင်းအစိတ်အပိုင်းတိုင်းဟာလည်း ခုမြင်နေရတဲ့သိမ်းမြစ်နဲ့ နှိုင်းဆမရအောင် နက်ရှိုင်းမှုတွေ စီးမျောပေါင်းယှက် ပါဝင်နေတယ်လို့လည်း ခံစားမိတယ်။ ကိုယ့်ဘဝဟာလည်း ဧရာဝတီရဲ့ အစိတ်အပိုင်းထဲမှာသာ ထာဝရရှိနေမှာပါ။
သာလွန်ထူးခြားမှုက အင်္ဂလိပ်တွေဟာ သိမ်းမြစ်ကို စနစ်တကျ အသုံးချနိုင်ကြတယ်။ ကိုယ်တို့က ဧရာဝတီကို သူတို့ လို အသုံးဝင်အောင် ပြုလုပ်နိုင်ခဲ့ပါရဲ့လား။ဒီအချက်အပေါ်မှာတော့ သိမ်းမြစ်က ဧရာဝတီထက်အဆ သိန်းသန်းကုဋေ မက သာလွန်ကောင်းသာလွန်နိုင်မယ်။ ဒါနဲ့အတူ သိမ်းမြစ်ရဲ့ကျော်ကြားမှုကလည်း ဧရာဝတီထက် ပိုကောင်းပိုနေ မယ်။ သိမ်းမြစ်ရဲ့ အောင်မြင်မှုကလည်း ဧရာဝတီထက် ပိုကောင်းပိုနိုင်တယ်။ ဟော၊ ကိုယ်ကြည့်နေစဉ်မှာပဲ ဝက်မီနီ စတာတံတားအောက်က ဖြတ်မောင်းသွားတဲ့ သင်္ဘောငယ်တစ်စီး။ ဒုတိယထပ်လေဟာပြင်မှာ ကမ္ဘာအရပ်ရပ်က ကမ္ဘာလှည့်ခရီးသည်တွေ အပြည့်တင်လို့၊ လန်ဒန်မြင်ကွင်းအလှကို သိမ်းမြစ်တွင်းကနေ လိုက်ပြနေတယ်။ သင်္ဘော ပေါ်ပါ ဒီလူတွေက သိမ်းမြစ်နဲ့လန်ဒန်ရဲ့အလှကို ကမ္ဘာနှံ့အောင် သယ်ဆောင်သွားလိမ့်မယ်ဆိုတာ ဘယ်မှာယုံမှား ဖွယ်ရှိဖို့ လိုမှာလဲ။
ကိုယ့်စိတ်ကူးအတွေးထဲမှာက သိမ်းမြစ်ဆိုတာ နှင်းပွင့်လေးတွေ တဖွဲဖွဲကျနေတဲ့ မှုန်ပျပျ ကောင်းကင်အောက်မှာ ပြာ လဲလဲ့ စီးဆင်းနေတဲ့ မြစ်တစ်စင်းပါ။ ခုကိုယ်တွေ့နေတဲ့ သိမ်းမြစ်က ကြည်လင်တဲ့ ကောင်းကင်နဲ့အတူ တောက်ပတဲ့ နေရောင်အောက်မှာ နောက်ကျုကျု စီးမျောနေတဲ့ မြစ်ငယ်တစ်စင်းသာသာ။ သေချာပါတယ်။ ကိုယ်ဟာ ဧရာဝတီကိုပဲ တမ်းတစွာ စွဲစွဲလမ်းလမ်း ချစ်ခင်သူပါ။ သိမ်းမြစ်ကိုဖြတ်လျောက်ပြီး ကမ်းခြေအတိုင်း ဘယ်ဘယ်ကို ကိုက်တရာ လောက်လျောက်လိုက်တော့ လန်ဒန်အိုင်းရဲ့ အခြေကိုရောက်သွားတယ်။ လန်ဒန်အိုင်း ဆိုတာ ဘာလဲလို့ သိချင် မလားပါပဲ။ လန်ဒန်အိုင်း (London Eye) ဆိုတာ-
လန်ဒန်အိုင်း-တဲ့။ သက္ကရာဇ် ၂ဝဝဝ ခုနှစ်၊မတ်လမှာ မီလီနီယံ (ရာစုပြည့်) အထိမ်းအမှတ်အဖြစ် ဖွင့်လှစ်ခဲ့တာ။ လန်ဒန်အိုင်းက လန်ဒန်ရဲ့ အထိမ်းအမှတ် တစ်ခုဖြစ်လာသလို ခေတ်သစ်ဗြိတိန်နိုင်ငံရဲ့ သင်္ကေတတစ်ခုလည်း ဖြစ်သပေါ့။ အင်ဂျင်နီယာနဲ့ ဗိသုကာပညာရဲ့ အောင်မြင်မှုတစ်ခုလို့လည်း ဂုဏ်ယူစွာ အလေးထားကြပါတယ်။ ခုဆို လန်ဒန်အိုင်းဟာ ခရီး သွားတွေကို အများဆုံးဆွဲဆောင်နိုင်တဲ့ လန်ဒန်ရဲ့ အထင်ကရ နေရာများစွာထဲမှာ တစ်ခုအပါအဝင် ဖြစ်လို့နေပါပြီ။ ထောင်စုနှစ် အထိမ်းအမှတ်အဖြစ် တည်ဆောက်ခဲ့တာကြောင့် The Millennium Wheel (ထောင်စုဘီးကြီး) ရယ်လို့လည်း သိထားကြတဲ့ လန်ဒန်အထိမ်းအမှတ် ခြားရဟတ်ဘီးကြီးကို အဓိက ငွေကြေးပံ့ပိုးခဲ့သူက ဗြိတိသျှလေ ကြောင်း ကုမ္ပဏီပေါ့။ ကမ္ဘာအရပ်ရပ်ကဧည့်သည်တွေ တစ်နှစ်ကို သုံးသန်းခွဲကျော်ကျော် ဒီလန်ဒန်အိုင်းကို အလည် ရောက်ပါတယ်တဲ့။
ရာသီဥတုကြည်လင်တဲ့နေ့တွေမှာဆိုလျင် ၄၄၃ ပေ အမြင့်ရှိတဲ့ လန်ဒန်အိုင်းကြီးရဲ့ အမြင့်ကနေ ကီလိုမီတာ လေးဆယ် (နှစ်ဆယ့်ငါးမိုင်) ခန့်ဝေးတဲ့ ဝင်ဆာရဲတိုက်ကိုပင် မြင်နိုင်တယ်လို့ဆိုပါတယ်။ လန်ဒန်အိုင်းက လန်ဒန်ရှိ အဆောက်အဦအားလုံးနီးပါးထက်မြင့်နေတာမို့ အရပ်မျက်နှားကို မျှော်ငေးလို့ ကြည့်ရှုနိုင်ပါတယ်။ လန်ဒန်အိုင်းရဲ့ ရှည်မျောမျော မှန်အလုံတပ် အခန်းထဲကနေ အနောက်ယွန်းယွန်းဆီ မျှော်ကြည့်လိုက်လျင်ဖြင့် ဘက်ကင်ဟန်နန်း တော်ကို စိမ်းညို့ညို့သစ်ပင်တွေကြားကနေ ထင်ထင်ရှားရှားတွေ့ရမှာပါ။ နန်းတော်ရဲ့ရှေ့မှာလည်း အတန်အသင့် ကျယ်ဝန်းတဲ့ မြေကွက်လပ်တစ်ခု။ နန်းတော်နေ အင်္ဂလန် ဘုရင်မကြီးရဲ့ ပွဲထွက်အခမ်းအနားတွေကျင်းပရာ နေရာ ဖြစ်လေမလား။ မြင်နေရတဲ့ရေကန်ကရော သားတော်သမီးတော်တွေ ရေတော်သုံးရာဖြစ်လေမလား။ ဒါတော့ အေး လွန်းလို့ ဖြစ်နိုင်မယ် မထင်ပါ။ ပြောရလျင်ဖြင့် ဘက်ကင်ဟန်နန်းတော်အကြောင်းကို လေ့လာမထားလို့ များများ စားစား မသိပါဆိုတာပါပဲ။
အနောက်တောင်ယွန်းယွန်း သိမ်းမြစ်တဖက်ကမ်းမှာတော့ ပါလီန်နဲ့ဘစ်ဘင်းနာရီစင်။ အရှေ›မြောက်ဆီမှာတော့ လန် ဒန်ရဲ့ အထင်ကရ တာဝါတံတား (Tower Bridge) ကြီးက ကောင်းကင်ပြာပြာနောက်ခံအောက်မှာ မားမားမတ် မတ်ရပ်လို့။ မြစ်ပြင်တွင်းက သင်္ဘောငယ်လေးတွေဆီကနေ ထွက်ပေါ်လာတဲ့ မီးရောင်လဲ့လဲ့လေးတွေကလည်း ရေပြင် ကျယ်မျက်နှာပေါ်မှာ စိန်ပွင့်လေးတွေ လင်းလက်နေသဏ္ဍာန်။ မျက်စိတဆုံးမြင်နေရတဲ့ သိမ်းမြစ်ပေါ်မှာတော့ တံတား ကြီးငယ်ပေါင်းများစွာက ကန့်လန့်ဖြတ် လဲလျောင်းလို့။
သိမ်းမြစ်ကမ်းတလျောက်မှာလည်း လူအုပ်တွေက ဖွေးဖွေး လှုပ်လှုပ်။ သွားသူသွားလို့ လာသူလာ။ လန်ဒန်အိုင်းခြေရင်းမှာရှိတဲ့ မြက်ခင်းပြင်မှာတော့ လန်ဒန်သူလန်ဒန်သား တွေက လဲလျောင်းလို့တသွယ်၊ ထိုင်နေလျက်တစ်စု၊ သူ့အုပ်စုလေးတွေနဲ့သူ နေစာလှုံနေကြလေရဲ့။ ၇ နာရီ ကျော်လို့ ည ဂ နာရီထိုးလုနီးတာပင် ကောင်းကင်မှာ နေမင်းကြီးက ထွန်းလင်းတောက်ပနေဆဲ။ လန်ဒန်မှာ နေသာချိန် နည်း လေတော့ ကြုံရတဲ့နေသာချိန်လေးကို အမိအရ အသုံးချနေကြဟန်တူရဲ့။ ကိုယ့်အတွက်တော့ နေသာချိန်ထက် မှုံပျပျ ရာသီက သဘာဝအလှကို ပိုမိုခံစားရာမှာ ပိုမိုပီပြင်တယ်လို့ ထင်မိပါရဲ့။ လွမ်တတ်သူမို့လားတော့ မဆိုနိုင်ဘူးပေါ့ နော့။
လန်ဒန်အိုင်းဟာ လန်ဒန်သားတွေအတွက် ဂုဏ်ယူစရာဖြစ်ကောင်းဖြစ်နေမှာပါ။ ကိုယ့်အတွက်တော့ သမိုင်းဝင် ရှေး ဟောင်းအနုပညာတွေ နက်နက်နဲနဲပျော်ဝင်နေတဲ့ လန်ဒန်ရဲ့အလှကြားမှာ ခေတ်မီကိရိယာတွေနဲ့ ခေတ်မီစွာ တည် ဆောက်ထားတဲ့ ဒီလန်ဒန်အိုင်းက လန်ဒန်ရဲ့ မဟာဆန်တဲ့ ဂန္ထဝင်အလှကို ဖျက်ဆီးနေဟန် ခံစားမိတယ်။
ကိုယ်ငယ် ငယ် ပုံဂံကိုလည်ခဲ့စဉ်က နီညိုရောင် ပုဂံရဲ့သမိုင်းအလှကြားမှာ ကြိုးကြားကြား မြင်ရတတ်တဲ့ ထုံးအဖွေးသား စေတီ ပုထိုးအချို့ကိုတွေ့ရတော့ ဆို့နင့်စွာ ကြေကွဲခဲ့ရတဲ့ ရင်နာဒဏ်တွေဟာ ခုထိတိုင် မပြယ်နိုင်နေသေးတာကို ပြန်လည် လို့ အမှတ်ရမိစေပါတယ်။ ဒီလိုဆိုတော့ ကိုယ့်ကို ရာဇဝင်ထဲမှာပဲထားရစ်ရမည့် ရှေးခေတ်ဂူအောင်းလူသားတစ်ဦး ရယ်လို့ မှတ်ချက်ပြုကောင်းပြုလိမ့်မယ်။
တကယ်တော့ ခေတ်မီနည်းပညာတွေနဲ့ သိပ်ပြီးမစိမ်းကားလှသလို ခေတ်သစ်လူမှုအဖွဲ့အစည်းရဲ့ အတွေးအခေါ်အယူအဆတွေနဲ့ အလွန်ကြီး မကင်းဝေးသူတစ်ဦးမို့ ဂူနေလူအတွေးမျိုးနဲ့ ကိုယ်ဒီစကားကိုဆိုတာ မဟုတ်ပါဘူး။ ရာဇဝင်နယ်ပယ်မှာ မော်ဒန်ရောင်ခြယ်သခြင်းဟာ ရာဇဝင်လည်း မပီ၊ မော် ဒန်ဟန်လည်း မကျ၊ စကောစက အသွင်အပြင်မျိုး ဖြစ်တတ်တာမျိုး ခံစားမိတတ်လို့ပါ။ ကိုယ်က သူ့နေရာနဲ့သူ ရာဇဝင်ကိုလည်း ထင်ကျန်စေချင်သူပါ။ လျော်ကန်တဲ့ တော်လှန်မှုမျိုးနဲ့ မော်ဒန်ကိုလည်း ရှင်သန်စေချင်သူပါ။ ဒါ ကိုယ့်အမှား ဟုတ်မယ်မထင်ပါဘူး။
လန်ဒန်ရဲ့သမိုးဝင်အလှတွေကို ကောင်းကင်ကနေ တဝကြီးငုံ့ကြည့်နိုင်တဲ့ လန်ဒန်အိုင်းကဆင်းပြီး သိမ်းမြစ်ကမ်းဘေး တလျောက် ခြေကျင်ခရီးနဲ့ အရှေ့မြောက်ယွန်းယွန်းဆီရှိ တာဝါတံတားကြီးထိအောင် လမ်းလျောက်ခဲ့တယ်။ သိမ်းမြစ် ကို ဖြတ်တိုက်လာတဲ့ လေပြေညင်းဟာ ကိုယ့်ခရီးအတွက် အေးမြတဲ့အတွေ့အထိနဲ့အတူ လှိုက်လှဲနွေးထွေးစွာ ကြို ဆိုခဲ့ပါတယ်။ တကယ်ဆို ဒီချိန်မှာ ကိုယ့်နဲ့အတူ မင်းရှိနေမယ်ဆိုလျင် မင်းလည်းကိုယ့်လိုပဲ ဝမ်းမြောက်မှုနဲ့အတူ ကြည်နူးမှုနဲ့အမျှ အလွန်ချမ်းမြေ့ဖွယ်ကောင်းတဲ့ လန်ဒန်ရဲ့ ဂန္ထဝင်အလှရသကို ပြည့်ပြည့်ဝဝ မျှဝေလို့ ခံစားမိမှာပါ။ တကယ်ပါ။ လန်ဒန်ဟာ အလည်ပျော်တို့အတွက် တကယ်သင့်လျော်တဲ့နေရာတစ်ခု ဖြစ်နိုင်မှာပါ။
မေတ္တာဖြင့် …အင်္ဂလန်ခရီး မပြီးသေးပါ - ၄
အရှင်ဉာဏိက
ဇူလိုင် ၁၇၊ ၂၀၀၉
လန်ဒန်အိုင်းကနေ တာဝါတံတားအထိ လမ်းတလျှောက်မှာ လန်ဒန်ရဲ့ထင်ရှားတဲ့ သင်္ကေတတွေကိုလည်း မှတ်သားမိပါတယ်။ တကယ်လို့ ကိုယ့်အတွက် ဥရောပဗီဇာရဖို့ အခွင့်မသာလျှင်ဖြင့် ဒီထင်ရှားတဲ့သင်္ကေတတွေထဲက အချို့ကိုတော့ အသေးစိတ်လေ့လာမိကောင်း လေ့လာနိုင်ဦးမလားပါ။ အနည်းဆုံးတော့ ဒီလမ်းကြောင်းအတိုင်း နောက်တစ်ခေါက် လျှောက်ဖြစ်ဦးမှာတော့ အသေအချာပါပဲ။ မသေချာသေးတဲ့အရာတွေအတွက် အဖြေရှာဖို့ တနေရာမှာ တခဏမျှနဲ့တော့ တိကျတဲ့အဖြေ ရနိုင်မယ် မဟုတ်ပါဘူး။ အပြန်အားဖြင့်ဆိုရလျှင် မသေချာတဲ့အရာတွေနဲ့ တနေရာမှာ အချိန်ကြာစွာ အဖြေရှာမယ်ဆိုလျှင်လည်း သေချာတဲ့အဖြေ ရနိုင်မယ်မဟုတ်ပေဘူးလို့ တွေးမိလိုက်သေးတယ်။
လန်ဒန်အိုင်းအလွန်မှာ မှတ်မိသမျှ ပြောရလျှင် The South Bank Centre၊ ပြီးတော့ Waterloo Bridge နဲ့ Black friars Bridge။ နောက်ပြီး The Tate Modern and the Millennium Bridge၊ ဒီအလွန်မှာတော့ St Paul's Cathedral ပေါ့။ Shakespeare's Globe၊ Southwark Bridge and Cannon Street Railway Bridge၊ Winchester Palace and the Clink Prison၊ Southwark Cathedral and London Bridge၊ Hays Galleria၊ Hays Wharf and HMS Belfast တို့ဟာလည်း ဒီသိမ်းမြစ်တောင်ကမ်း လျှောက်လှမ်းခြင်းခရီးရဲ့ အစိတ်အပိုင်းမို့ မပြောမပြီး ထည့်ပြောရမည့် လန်ဒန်ရဲ့ အထိမ်းအမှတ်များပါပဲ။
အားလုံးမှာ ဆိုင်ရာဆိုင်ရာ စိတ်ဝင်စားဖွယ်ရာတွေ အပြည့်ရှိနေပေမယ့် ခုတော့ ပြောဖို့ အချိန်နည်းနေသေးတယ်။ အဆင်သင့်လျှင်ဖြင့် နောက်များမှာ တစ်ခုချင်းစီရဲ့ အကြောင်းကို ပြောပြပါဦးမယ်။ နားထောင်ချင်တယ်ဆိုလျှင်ပေါ့။ ခုတော့ ကိုယ်လျှောက်နေတဲ့လမ်းအတိုင်း ဆက်သွားရဦးမယ်လေ။ အမှောင်မကျလာမီမှာ တာဝါတံတားကြီးဆီကို အရောက်သွားရဦးမယ် မဟုတ်လား။ ခုလိုနေညိုချမ်းမှာတွေ့ရမယ့် တာဝါတံတားကြီးရဲ့အလှက တမျိုးထူးခြားနေလိမ့်မယ်လို့ မျှော်လင့်ထားတာ။ တွေ့မြင်ဖူးထားတဲ့ ဓာတ်ပုံတွေ၊ ဗီဒီယိုရုပ်ရှင်တွေထဲက တံတားကြီးနဲ့ အပြင်မှာ ကိုယ်တကယ်တွေ့ရတဲ့ တံတားကြီးက ဘယ်လိုများ ကွာခြားနေမလဲ။ နှိုင်းယှဉ်ပြီး ကြည့်ရဦးမယ်။ ဟုတ်တယ်လေ။ တချို့အရာတွေက ပုံထဲနဲ့ ပုံပြင်၊ လက်တွေ့နဲ့ စာတွေ့၊ အနီးနဲ့အဝေး၊ အပုံကြီး ကွဲပြားခြားနားတတ်တာ မဟုတ်လား။ တာဝါတံတားလည်း ဒီအထဲမှာ မပါဝင်နိုင်ဘူးရယ်လို့ ဘယ်လိုပြောနိုင်မလဲ။
လန်ဒန်ရဲ့ အလှတွေကြားမှာ ကိုယ့်စိတ်ကို ယားကျိကျိဖြစ်စေနိုင်ခဲ့တာတချို့ကိုလည်း ပြောချင်ပါသေးတယ်။ လျှောက်လှမ်းခဲ့လမ်းတလျှောက် အမှတ်မထားဘဲ မနေနိုင်လောက်အောင်ဖြစ်မိတာက လမ်းဘေးးမှာ တွေ့ရတတ်တဲ့ စီးကရက်ဆေးလိပ်တိုတွေပါပဲ။ ကိုယ်ကြားဖူးထားတာက အင်္ဂလိပ်တွေဟာ စည်းကမ်းကြီးတယ်တဲ့။ ခုတော့ လမ်းဘေးဝဲယာ နေရာတကာ စီးကရက်တိုတွေ တွေ့နေရတယ်။ လန်ဒန်သားတွေကပဲ စီးကရက်သောက်တာ များလို့လား။ ဒါမှမဟုတ် ကမ္ဘာလှည့်ခရီးသွားတွေကပဲ ဆေးလိပ်အသောက်များလို့လား။ ဘာပဲဖြစ်ဖြစ် ခုလိုစီးကရက်အစီခံတွေ လူစည်ကားရာ လန်ဒန်ရဲ့ အဓိကနေရာတွေမှာ တွေ့ရတာကတော့ လုံးဝ မဆီလျော်လှတာ အမှန်ပါပဲ။
မြစ်ကမ်းတလျှောက် ဘီယာဆိုင်တွေမှာလည်း ဘီယာသောက်နေသူတွေက အပြည့်။ ရုံးဆင်းပြီးချိန်ဖြစ်တာကြောင့် ခုလို ဘီယာသောက်နေသူတွေနဲ့ စည်ကားတာလည်း ဖြစ်နိုင်ပါတယ်။ ဒါမမဟုတ်လည်း ယဉ်ကျေးမှုကပဲ ဘီယာသောက်ခြင်းဟာ ကျင့်ဝတ်တစ်ခုကို လျော့ပါးစေခြင်းလို့ မသတ်မှတ်တာကြောင့်လည်း ဖြစ်နိုင်ပါတယ်။ အမူအယာတွေအရတော့ ဘီယာသောက်ခြင်းဆိုတာ လက်ဖက်ရည်ဆိုင်ထိုင်ခြင်းနဲ့ အတူတူလောက်ပဲ သဘောထားပုံမျိုးပါ။ ပျိုပျို အိုအို ယောက်ျားမိန်းမ အလွှာအစုံစုံ။ ခုံတန်းတွေပေါ်၊ အုတ်အကာအရံတွေပေါ်မှာ ထိုင်သူထိုင်၊ ရပ်သူရပ်၊ လျှောက်သူလျှောက်ကာဖြင့် ဘီယာခွက်တွေ ကိုယ်စီရယ်နဲ့။ ရယ်ရယ်မောမော။ တသောသောပါပဲ။ သိမ်းမြစ်ညနေချမ်း၊ အမောပန်း ဖြေနေကျဟန်ထင့်။ သို့ပေမယ့် အသက်နှစ်ဆယ်ခန့်လောက်အောက် ငယ်ရွယ်သူများကိုတော့ ဘီယာနယ်မှာ မတွေ့ရပါဘူး။ ဒီအတွက်တော့ ကျေနပ်စရာပါ။
နောက်ပြီးလည်း လန်ဒန်သူ လန်ဒန်သားတွေက စနစ်တကျ ဝတ်စားတတ်ကြဟန်တူပါတယ်။ အားလုံးနီးပါးဟာ တကယ့်ကိုမှ သားသားနားနား စနစ်တကျ အဝတ်အစားတွေ ကိုယ်စီကိုယ်စီနဲ့ပါ။ အမေရိကန်မှာတွေ့ရတတ်လေ့ရှိတဲ့ ထသွားထလာ အိမ်နေပုံစံ အဝတ်အစားမျိုးနဲ့သူက မတွေ့ရသလောက်ပါ။ နောက်ပြီး မဆတန်ကဲ အဝလွန်တဲ့သူမျိုးကိုလည်း မတွေ့မိပါဘူး။ အမျိုးသမီးအများစုဟာလည်း သွယ်သွယ်လျလျ၊ ဖျတ်ဖျတ်လတ်လတ်၊ စတိုင်အပြည့် ကိုယ်စီနဲ့။
တာဝါတံတားဟာ ကမ္ဘာမှာ အလွန်ထင်ရှားပေမယ့် လန်ဒန်တံတားရယ်လို့ အမှတ်မှားတာကို မကြာခဏ ခံရလေ့ရှိပါတယ်။ တကယ်တော့ လန်ဒန်တံတားနဲ့ တာဝါတံတားက တခြားစီပါ။ သို့ပေမယ့် တာဝါတံတားက လန်ဒန်မှာ ရှိတာရယ်၊ လန်ဒန်မှာ သူက ပိုထင်ရှားတာရယ်ဆိုတော့ လန်ဒန်တံတားဆိုလျှင်ဖြင့် တာဝါတံတားကိုသာ စိတ်မျက်စိထဲ မြင်ယောင်မိတတ်ပါတယ်။ ကိုယ်တောင် ခုမှ ကွဲကွဲပြားပြား သိရတာပါ။ လန်ဒန်မှာ လန်ဒန်အမည်ကို မခံယူခဲ့ခြင်းဟာ တာဝါအဖို့ လန်ဒန်ရယ်လို့ ခုလိုအမှတ်မှားရန်အကြောင်း ဖြစ်လေသလားလို့ စဉ်းစားမိပါရဲ့။ လန်ဒန်နဲ့ တာဝါတံတားရဲ့ ကျော်ကြားမှု ၂ ခုပေါင်းစပ်ခြင်းက လန်ဒန်တံတားရယ်လို့ မှားယွင်းတဲ့အမှတ်မှားစေမှုကို ဖြစ်စေနိုင်သလားလို့လည်း တွေးမိပါတယ်။ ထင်ရှားခြင်းတွေကြားမှာလည်း မှားယွင်းမှုတွေ ရောယှက်နေတတ်တာ ဆင်ခြင်စရာပဲ မဟုတ်လား။
နေဝင်ဖျိုးဖျ အချိန်ကာလမှာပဲ တာဝါတံတားဆီ ရောက်ပါတယ်။ ရှေးစကားအတိုင်း ရေးသားရလျှင် အနောက်ဂေါယာကျွန်းဆီသို့ နေမင်းကြီးက ငုပ်လျှိုးကွယ်ပျောက်တော့မယ်။ နေရှိန်ကြောင့် ကောင်းကင်ယံမှာလည်း ပုစွန်ဆီသွေး တိမ်ရောင်စဉ်တွေကလည်း ပြေးလို့။ သိမ်းမြစ်ပြင်တွင်းမှာလည်း နေမင်းက တစ်စင်း။ တာဝါတံတားကြီးရဲ့ နေဘက်မြင်ကွင်းကတော့ လင်းလို့။ နေမင်းကွယ်ကာတဲ့ အခြားတဖက်မှာတော့ အမှောင်က ကြီးစိုးလို့ ဝင်ရောင်စ။ လန်ဒန်ရဲ့ ဟိုးဝေးဝေး မှုန်ပျပျအရပ်ဆီမှာတော့ လျှပ်စစ်မီးပွင့်လေးတွေက တလက်လက်နဲ့ ပိုပိုပြီး လင်းလို့လာကြ။ နေရဲ့အလင်းကို အစားထိုးဖို့ တိုးလျှိုးလို့ ပေါ်လာကြပြီ။ အစာဝလို့ အိပ်တန်းကိုယ်စီဝင်ကြမည့် ငှက်လေးတွေလား၊ အစာရှာဖို့ အိပ်တန်းထွက်လာတဲ့ ငှက်လေးတွေလား မသိ။ သိမ်းမြစ်ပြင်ရဲ့ ကောင်းကင်တခွင်မှာ ဟိုဟိုဒီဒီ ပျံဝဲလှုပ်ရှားလို့။ သိမ်းမြစ်ကမ်းစပ်နဲ့ မြစ်လယ်ရေပြင်ကျယ်ပေါ်မှာတော့ သင်္ဘောငယ်လေးတွေကိုယ်စီနဲ့ လန်ဒန်ရဲ့ညအလှကို အပြည့်အဝ ခံစားမည့်သူတို့က စတင်လှုပ်ရှားနေကြပြီ။ ကိုယ့်အဖို့တော့ ဒီအချိန်ဟာ လန်ဒန်မှာ ပထမနေ့ ကုန်ဆုံးချိန်ရဲ့ အစပါပဲ။ အနှစ်နှစ်အလလက တမ်းတခဲ့ရတဲ့ လန်ဒန်နေ့များရဲ့ ခရီးအစဟာဖြင့် လှပစွာပြီးဆုံးတော့မယ်။ လန်ဒန်ရဲ့ ကောင်းကင်ယံ တိမ်ရောင်ပြန် သံစဉ်အလှ သိမ်းမြစ်ပြင်ပေါ် ပြန်အကျမှာ မြင်ရတဲ့ တာဝါတံတားရဲ့ ခန့်ညားမှုနဲ့အပြိုင် လှချင်တိုင်းလှနေတဲ့ လန်ဒန်ရဲ့နေညိုညဟာဖြင့် စာသ လို့ ကုန်နိုင်ဖွယ် မထင်မိတော့ပါဘူး။
တာဝါတံတားကိုဖြတ်၊ လန်ဒန်တာဝါကိုပတ်ကာ လန်ဒန်ဝိဟာရကို ပြန်ဖို့ တာဝါဟေးလ် မြေအောက်ရထားဘူတာဆီသို့ သွားခဲ့တယ်။ လန်ဒန်တာဝါကလည်း ရဲတိုက်ကြီးလား ခန့်ခန့်ထည်ထည်။ သူနဲ့ဆက်စပ်တဲ့ သမိုင်းအချက်အလက်တွေလည်း ပေါကြွယ်သမို့ အချိန်ပေးကာ လာလည်ဖို့ ဦးစားပေးစာရင်းထဲ ထည့်ထားလိုက်တယ်။ တာဝါတွေရယ်။ မကြာမီအချိန်မှာပဲ ပြန်လည်တွေ့ကြမယ်။ ။
ဇွန်လ ၂၊ ၂ဝဝ၉
ဒီနေ့ ဂရင်းနစ်ကို သွားခဲ့တယ်။ ‘ဂရင်းနစ်’ ဆိုတဲ့ နာမည်က အားလုံးနဲ့ မစိမ်းတဲ့ နာမည်။ လူသားအားလုံးရဲ့ နေ့စဉ်ဘဝ လှုပ်ရှားသွားလာမှု၊ ရှင်သန်နေထိုင်မှုမှာ အချိန်ကာလဆိုတာနဲ့ မကင်းတတ်ကြဘူး မဟုတ်လား။ အလုပ် တက်ချိန်၊ အလုပ်ဆင်းချိန်၊ ဈေးသွားဈေးလာချိန်၊ ကျောင်းတက်ကျောင်းဆင်းချိန်၊ တရားနာချိန်၊ တရားမှတ်ချိန်၊ အိပ်ချိန်၊ နံနက်စာ ညစာစားချိန် စသဖြင့် လူသားတစ်ယောက်ရဲ့ နေ့စဉ်လှုပ်ရှားမှုများကို အချိန် ကာလနဲ့ သတ်မှတ်ကြတယ်။ လူတစ်ယောက်ရဲ့လုပ်အားကိုလည်း အချိန်ကာလနဲ့ တိုင်းတာတတ်ကြတယ်။ ဒီအချိန်ကာလဆိုတာကို သတ်မှတ်မှုမှာ ကျေနပ် နှစ်သက်သည် ဖြစ်စေ၊ မနှစ်သက်သည်ဖြစ်စေ၊ အများ သဘောတူထားကြတဲ့ စံနှုန်းတစ်ခုရှိတယ်။ အဲဒါကတော့ ‘ဂရင်းနစ် စံတော်ချိန်’ ဆိုတာပေါ့။
အချိန်ဆိုတာအပေါ် သိပ်ပြီးလေးလေးနက်နက်မရှိလှတဲ့ ကိုယ်ကတော့ ဂရင်းနစ် စံတော်ချိန်ရဲ့ သဘောသဘာဝကို ကောင်းကောင်း နားမလည်သလို နားလည်အောင်လည်း ကြိုးစားဖို့ စိတ်မဝင်စားလှပါဘူး။ သို့ပေမယ့် သည်ဂရင်းနစ်ကိုအခြေခံတဲ့ နေ့ညသတ်မှတ်မှုများ၊ အချိန်ကာလ သတ်မှတ်မှုများကတော့ ကိုယ့်ဘဝအပေါ်မှာ တနည်းအားဖြင့်တော့ ပြဋ္ဌာန်းလွှမ်းမိုးနေလေရဲ့။ ဒါကြောင့် လန်ဒန်ကိုရောက်ခိုက် အထင်ကရ နေရာများကို သွားဖို့ဆုံးဖြတ်တော့ သည်ဂရင်းနစ်ဆိုတဲ့ နေရာလေးက ထိပ်ဆုံးက ပါဝင်လာတယ်။ သွားသင့်သွားထိုက်တဲ့ နေရာတွေကို လိုက်ပါပို့ဆောင်ကြတဲ့ လန်ဒန်နေအိမ်ရှင်များရဲ့ ဦးစားပေး စာရင်းထဲမှာလည်း ပါဝင်ခဲ့တယ်။ ဂရင်းနစ်က သမိုင်းဝင်နေရာ တစ်ခုပေကိုး။
ဂရင်းနစ်ဆိုတဲ့ မြို့လေးက လန်ဒန်ရဲ့ အရှေ့တောင်အရပ်ဆီမှာ ရှိပါတယ်။ သ်ိမ်းမြစ်ရဲ့ တောင်ဘက်ကမ်းခြေမှာ တည်ရှိတဲ့ မြို့ငယ်လေး။ ပရိုင်းမီရီဒီယံခေါ်တဲ့ ဇီးရိုး(သုည) လောင်ဂျီကျုမျဉ်းပေါ်မှာ တည်ရှိတဲ့မြို့ပေါ့။ အင်နာနေရှင်နယ် ဒိတ်လိုင်းခေါ် ကမ္ဘာကြီးကို အရှေ့ခြမ်း အနောက်ခြမ်း ခွဲခြား သတ်မှတ်တဲ့ ၁၈ဝ ဒီဂရီ လောင်ဂျီကျု မျဉ်းကြောင်းနဲ့ ဆန့်ကျင်ဘက် အရပ်မှာ ရှိတယ်လို့ ဆိုနိုင်တဲ့ အရပ်မှာပေါ့။ ဂရင်းနစ်မှာ သမိုင်းဝင်ပြီး ဗိသုကာ ပညာရှင်များရဲ့ ဖွဲ့စည်းပုံ ဆန်းပြားတဲ့ အဆောက်အဦများရဲ့ တည်ဆောက်ဟန်များကြောင့် ၁၉၉၇ ခုနှစ်ကစပြီး ကမ္ဘာ့ ကုလသမဂ္ဂရဲ့ ယူနက်စကိုကနေ ဂရင်းနစ်ဒေသကို ကမ္ဘာ့သမိုင်းဝင် နေရာတွေထဲမှာ ထည့်သွင်းခဲ့ပါတယ်။ ဒီတော့ ဂရင်းနစ်ဟာ ခုတော့လည်း ကမ္ဘာ့သမိုင်းဝင် နေရာတစ် ခုအဖြစ် ကမ္ဘာအရပ်ရပ်က ခရီးသွားများရဲ့ တကူးတက လာရောက်ကြည့်ရှုရတဲ့ နေရာတစ်ခု ဖြစ်နေပြီပေါ့။ မှတ်တမ်းပြုမှုမှာ ထူးခြားလှတဲ့ အင်္ဂလိပ်တွေရဲ့ အစွမ်းအစနဲ့ ကိုယ့်နိုင်ငံ ကိုယ့်ဒေသရဲ့ ဂုဏ်ယူဖွယ် ရှေးဟောင်း အလှတွေကို စနစ်တကျ ထိန်းသိမ်းတတ်မှုများရဲ့ အကျိုးဆက်တွေကလည်း ခုလို ဂရင်းနစ် ကမ္ဘာကျော်စေဖို့ အထောက်အပံ့ကောင်းတွေလည်း ဖြစ်မှာပေါ့။
ကိုယ်ကတော့ ဂရင်းနစ်ကို ရောက်ခိုက် ကြံကြံဖန်ဖန် ဆရာတော်ဦးဗုဓ်နဲ့ အမတ်ကြီး ဦးပေါ်ဦးတို့ အကြောင်းကို သွားသတိရမိတယ်။ ဟုတ် မဟုတ်၊ မှန် မမှန်တော့ မသိဘူးပေါ့။ ကိုယ်တို့လူမျိုးက စာနဲ့ပေနဲ့သာ စနစ်တကျ မှတ်တမ်းမတင်တတ်တာ၊ ရှေးလူကြီး ပြောစကားဆိုတဲ့ ပါးစပ်ရာဇဝင်ကတော့ ကြွယ်ဝလှ မဟုတ်လား။ မှန်တာလည်းရှိ၊ မမှန်တာလည်းရှိ။ ဆရာတော်ဦးဗုဓ်က မိန့်ကြားဖူးတယ် တဲ့။ ‘အရှင်မဟာဗုဒ္ဓွဃောသ က အရင်ဖွားလို့ပေါ့ကွာ၊ အရှင်မဟာဗုဒ္ဓဃောသရဲ့ အရင်သာ သူဖွားခဲ့လျှင် အရှင်မဟာဗုဒ္ဓွဃောသရေးတဲ့ အဋ္ဌကထာကျမ်းစာတွေကို သူရေးမှာ’ လို့ မိန့်ဖူးတယ်တဲ့။ အရှင်မဟာဗုဒ္ဓွဃောသ ဆိုတာကတော့ ခုခေတ် ထေရဝါဒပိဋကသမိုင်းမှာ ဗုဒ္ဓွပြီးလျှင် အထင်ရှားဆုံး ဆရာတော်တစ်ပါး။ ရှေးဆရာစဉ်ဆက် စကားအရ ပြောရလျှင် ဗုဓ်စ၊ ဗုဓ်လယ်၊ ဗုဓ်ဆုံး ဆိုပြီး သုံးပါးရှိရာမှာ ဗုဓ်လယ်လို့ ညွှန်းဆိုရတဲ့ မထေရ်မြတ်တစ်ပါး။ ဗုဒ္ဓွဟောကြားတော်မူခဲ့တဲ့ ပါဠိတော်များကို နောင်လာနောက်သားတွေ ပိုမို နားလည်လွယ်အောင် အနက်အဓိပ္ပာယ် ဖွင့်ဆိုချက် ဆိုင်ရာများကို ပါဠိဘာသာနဲ့ ရေးသားခဲ့တဲ့ အရှင်မြတ်တစ်ပါး။ ဗုဓ်ဆုံးလို့ သတ်မှတ်ခံရတဲ့ ဆရာတော်ဦးဗုဓ်ကတော့ ပါဠိတော်များကို နိဿယ (မြန်မာဘာသာ) ပြန်ဆိုရာမှာ အထူးထင်ရှားတဲ့ ဆရာတော်တစ်ပါးပေါ့။
ကုန်းဘောင်ရာဇဝင်ကို ပြောလေတိုင်း ဘကြီးတော် (မှန်နန်းရှင်) မင်းတရားကြီးရဲ့ မိဖုရားခေါင်ကြီး နန်းမတော်မယ်နု အကြောင်းကို ချန်ထားလို့ မရနိုင်ပါဘူး။ တဆက်တည်းမှာပဲ နန်းမတော်မယ်နုနဲ့ ဆရာတော်ဦးဗုဓ်တို့ရဲ့ ဆရာဒကာ ဆက်ဆံရေးကို စံယူဖွယ်အဖြစ် ပြောတတ်ကြတယ်။ ဦးဗုဓ်ကို သတိရမိတာကတော့ ဦးဗုဓ်လိုပဲ ကိုယ်လည်း ‘အင်းပေါ့လေ။ အင်္ဂလိပ်တွေက သူတို့ရဲ့ ဂရင်းနစ်မြို့လေးကို ဗဟိုပြုပြီး တကမ္ဘာလုံးက လက်ခံကြရတဲ့ ဂရင်းနစ်စံတော်ချိန်ကို သတ်မှတ်ခဲ့ကြလို့ပေါ့။ နို့မဟုတ်လို့ ကိုယ်သာ သူတို့ အရင်မွေးလို့ အချိန် သတ်မှတ်ရမယ်ဆိုလျှင် ကိုယ်မွေးဖွားခဲ့တဲ့ ဟိုအဝေး မြန်မာနိုင်ငံ အညာဒေသက ‘ရေဦး’ ဆိုတဲ့ မြို့လေးကို ဗဟိုပြုလို့ ရေဦးစံတော်ချိန်ရယ်လို့ သတ်မှတ်မှာပေါ့’ လို့ တွေးမိလို့ပါ။ မရယ်နဲ့နော်။ ဒါ တကယ် တွေးမိတာကို ပြောတာ။ နောက်ပြီး ကိုယ်က နန်းမတော်မယ်နု နန်းကျပြီး အသတ် ခံရဆဲနီးနီးမှာ ဆရာတော်ထံ ဝင်ရောက်ဖူးမြင်တော့ ဆရာတော်ဦးဗုဓ်ရဲ့ ‘မိနုရယ်၊ ဝဋ်ရှိလျှင်ဖြင့် ခံရမှာပေါ့’ ဆိုတဲ့ စကားတစ်ခွန်း ကြားရရုံမျှနဲ့ ‘မိနုတို့ လူဖြစ်ကျိုး နပ်ပြီ၊ သေပျော်ပါပြီ’ ဆိုပြီး ရဲရဲတောက် ဥဒါန်း ကျူးရင့်ခဲ့တဲ့ မိဖုရားခေါင်ကြီး နန်းမတော်မယ်နုရဲ့ ဇာတိ ရေဦးမြို့နယ်၊ ဖလံခုံရွာသား။ သမိုင်းနဲ့လာတာ။ သမိုင်းတွေ အစဉ်အလာတွေကို တန်ဖိုးထားတတ်ကြတဲ့ အင်္ဂလ်ိပ်တွေကို ကိုယ်လည်း သမိုင်းအစဉ်အလာနဲ့ပါ ဆိုတာကို ပြောရာလည်း ရောက်သွားအောင်ပေါ့လို့ တွေးမိတယ်။ ဒီလိုဆိုတော့ သမိုင်းကို တန်ဖိုးထားတဲ့ အင်္ဂလိပ်တွေက ကိုယ့်ကို ကောင်းချီးများ ပေးလေဦးမလား မသိနိုင်ဘူး။
အမတ်ကြီး ဦးပေါ်ဦးကလည်း ဘိုးတော်ဦးဝိုင်းကို လျှောက်တင်ဖူးတယ်တဲ့။ ဘိုးတော်က ဦးပေါ်ဦးကို ‘ကမ္ဘာကြီးရဲ့ အလယ်ခေါင်တည့်တည့် အရပ်ဟာ ဘယ်မှာလဲ’ ဆိုတော့ နန်းတော်ပေါ်က ဆင်း၊ နန်းတော် လှေကားခြေရင်းမှာ ငုတ်တစ်တိုင် စိုက်ပြီး ‘ဒီငုတ်တိုင်နေရာဟာ ကမ္ဘာ့အလယ် တည့်တည့်ပါ’ လို့ လျှောက်တင်သတဲ့။ ဒီတော့ ဘိုးတော်က ဟုတ်ရဲ့လား ပေါ်ဦးရယ်ဆိုတော့ မယုံလျှင် တိုင်းကြည့်ပါဘုရားလို့ လျှောက်တင်ဖူးသတဲ့။ ခုလည်း ကမ္ဘာကြီးကို အရှေ့အနောက်ခြမ်းရာမှာ ဂရင်းနစ်မျဉ်း နေရာဟာ ကမ္ဘာ့အလယ်ခေါင်တည့်တည့်ပါ ဆိုတော့ အင်္ဂလိပ်တွေ ကမ္ဘာကို စိုးမိုးချိန်က အင်္ဂလိပ်ဘုရင်တွေ အနီးမှာ အမတ်ကြီး ဦးပေါ်ဦးလို မယုံလျှင် တိုင်းကြည့်ပါလို့ ပြောသူများ ရှိနေလို့လားလို့ ဆိုင်သလား မဆိုင်သလားမသိ၊ သွားလို့ဖြင့် တွေးမိလိုက်ပါသေးတယ်။ ခုတော့ ကိုယ်က သူတို့သတ်မှတ်ထားတဲ့ ကမ္ဘာ့အလယ် မျဉ်းကြောင်းပေါ်မှာ တည့်တည့်မတ်မတ် ရပ်လို့။
ကိုယ်ဂရင်းနစ်ကို ရောက်တော့ အချိန်က ညနေ ၅ နာရီ။ ရွိုင်ရယ် အော်ဘဆတရီ ပြတိုက်ကတော့ ပိတ်သွားပြီ။ ဂရင်းနစ်မျဉ်းကြောင်း တည်ရှိရာ အော်ဘဆတရီ တောင်ကုန်းမှာတော့ ကိုယ်တို့လိုပဲ နောက်ကျ လေ့လာသူအချို့နဲ့ စည်ကားနေရဲ့။ ဂရင်းနစ်မျဉ်းပေါ် ရပ်လို့ မှတ်တမ်းတင်သူက တင်၊ မျဉ်းဘေးရေးထားတဲ့ နိုင်ငံစာလုံးတွေထဲမှာ ကိုယ့်နိုင်ငံ ဘယ်ဆီမှာ တည်ရှိလေသလဲလို့ စူးစမ်းသူက စူးစမ်းလို့။ ကမ္ဘာအရပ်ရပ်က လာကြသူတွေဆိုတော့ ရှာဖွေရာ အရပ်တွေလည်း ကွဲပြား ခြားနားပေမပေါ့။ သူများနည်းတူ ကိုယ်လည်းပဲ ကိုယ့်ရဲ့ ရွှေနိုင်ငံ ဘယ်မှာလဲလို့ စူးစမ်းမိပါတယ်။ တွေ့ပါပြီ။ Rangoon ၉၆ံ တဲ့။ ၉၆ ဒီဂရီက ဘာကို ဘယ်လိုညွှန်း ဆိုတာတော့ မသိတာအမှန်ပါ။ ကောလိပ်မှာတုန်းက ဂျင်နရယ်အကျူကေးရှင်းအဖြစ် မသင်ချင့် သင်ချင် သင်ယူခဲ့ရတဲ့ ပထ၀ီဘာသာရပ်ကလည်း ကိုယ့်ခေါင်းထဲမှာ နည်းနည်းလေးမှပင် မထင်ကျန်တော့။ လောင်ဂျီကျုနဲ့ လတ္တီကျုတောင်မှ ကွဲကွဲပြားပြား မမှတ်မိတော့။
ဂရင်းနစ်ကုန်းမြင့်ဆီကနေ အရှေ့မြောက်စူးစူးဆီ လှန်းမျှော် ကြည့်လိုက်တော့ သိမ်းမြစ်ကို လှမ်းလို့မြင်ရတယ်။ နောက်ပြီး အမိုးတစ်ခုတည်းသာရှိတဲ့ အဆောက်အဦများထဲမှာ ကမ္ဘာမှာ အကြီးဆုံးပါလို့ ဂုဏ်ယူကြတဲ့ မီလီနီယံဒုန်း (The Millennium Dome) ခေါ်တဲ့ အဝေးကနေကြည့်လျှင် လိပ်ကျောကုန်းပေါ်မှာ ထိုးထိုးထောင်ထောင် ငါးဆူးတောင်ကြီးတွေ တင်ထားသလို မြင်ရတဲ့ ခေါင်မိုးဝါဝါ အဆောက်အဦကြီးကိုလည်း လှမ်းလို့မြင်နေရတယ်။ သိမ်းမြစ်ကမ်းတလျှောက်မှာတော့ သဘောင်္ကြီးငယ်တွေက အစီအရီ။ တိုက်တာ အဆောက်အဦတွေကလည်း အချို့နိမ့်နိမ့်၊ အချို့မြင့်မြင့်။ မိုးတိမ်ညို့ညို့နောက်ခံမှာ ထင်ရှားစွာ လှမ်းလို့မြင်ရ။ တောင်ခြေရှိ ဂရင်းနစ် ပန်းခြံထဲမှာတော့ သစ်ပင်ပေါင်းစုံတို့က စိမ်းစိမ်းစိုစို၊ စီစီရီရီ၊ ညို့ညို့မှိုင်းမှုိုင်း။ ကောင်းကင် တခွင်လုံးလည်း အုံ့ဆိုင်းရီဝေလို့။ အော်ဘဆတရီ တောင်ခြေအနီးမှာတော့ ပင်လယ် ရေကြောင်းဆိုင်ရာ သိကောင်းဖွယ်ရာတွေ ပြသထားတဲ့ National Maritime Museum နဲ့ Queen's House ဘုရင်မအိမ်(နန်းတော် မဟုတ်) အဆောက်အဦကြီးများက ခန့်ခန့်ထည်ထည်။
ရောက်တုံးရောက်ခိုက် မှတ်မှတ်ရရ ဖြစ်စေဖို့ ဂရင်းနစ်မျဉ်းကြောင်းပေါ် အမှတ်တရ ဓာတ်ပုံရိုက်နေခိုက်မှာပဲ မိုးစက်မိုးပေါက်အချို့က ကိုယ့်ခေါင်းပေါ် ကျလာတယ်။ ဒီမိုးစက်မိုးပေါက်တွေကို သူ့ပကတိအတိုင်း ကောက်သိမ်းလို့ရလျှင် ကောက်သိမ်းထားလိုက်ချင်သား။ နောင်မှာ အထူးအဆန်းအဖြစ် ပြသလို့ရအောင်ပေါ့။ ဟုတ်တယ်လေ။ ဒီမိုးစက်တွေလည်း အဆုံးအစမဲ့ မိုးကောင်းကင်ကြီးရဲ့ အလယ်ခေါင် တည့်တည့်က ကျလာတာမဟုတ်ဘူးလို့ရော ဘယ်သူ ပြောနိုင်ပါ့မလဲ နော။ ။
အရှင်ဉာဏိက
သြဂုတ် ၁၇၊ ၂၀၀၉
ခက်ခက်ခဲခဲ ပြုစုပျိုးထောင်နေစရာ မလိုဘဲ လွယ်လင့်တကူ စိုက်ပျိုးနိုင်၊ ရှင်သန်ကြီးထွားနိုင်တဲ့ ရေမြေသဘာဝ သြဇာအလှတွေနဲ့ ပြည့်ဝလှတဲ့ ကိုယ့်ပြည်ကိုယ့်ရွာမှာလည်း ခုလို စနစ်တကျ ထိန်းသိမ်းစောင့်ရှောက်ထားတဲ့ ဥယျာဉ်မျိုးတွေကို တိုင်းနဲ့ပြည်နယ်၊ မြို့ရွာအနှံ့ နေရာတကာ တွေ့ချင်လိုစိတ် ယိုဖိတ်ကာ ဖြစ်မိသား။ သို့ပေမယ့် ကိုယ့်ဆန္ဒတွေက စိတ်ကူးအိပ်မက်ထဲမှာသာ ရှိနေဆဲပါ။ ကိုယ့်ဆီမှာ ခုလိုပဲ စိမ်းလန်းစိုပြည်စွာ လှပနေတဲ့ဥယျာဉ်မျိုးက မရှိသလောက်ရှားသား။ မှတ်မှတ်သားသားဆိုရလျှင်ဖြင့် ကိုယ့်ပြည်ကိုယ့်ရွာက ခုလိုဥယျာဉ်မျိုးထဲကို တခါမှတော့ အပန်းဖြေ လမ်းလျှောက်ခဲ့ရတာမျိုး မရှိခဲ့ဖူးတာ အမှန်ပါ။ ဂရင်းနစ်ဥယျာဉ်တွင်းမှာတော့ ငြိမ်းအေးသက်သာစွာ အနားယူအပန်းဖြေနေသူတွေ၊ ကျန်းမာရေးအတွက် လမ်းလျှောက်နေသူ၊ ပြေးလွှားကစားနေသူတွေကို ဟိုနားဒီနား မြင်နေရတယ်။ အိုး .. မိတ်ဆွေတို့ရေ။ စိတ်အပန်းလည်း ကင်းပါစေ၊ ရုပ်အနွမ်းလေး ရှင်းပါစေ။
ဂရင်းနစ်ဥယျာဉ်ကိုဖြတ်ပြီး The National Maritime Museum ဘက်ကို သွားခဲ့တယ်။ ပြတိုက်က ပိတ်နေပြီ။ အချိန်က နှောင်းနေပြီကိုး။ ပြတိုက်အနီးမှာရှိ ကင်းဝီလျံလမ်းပေါ်ကနေ The Old Royal Naval College ဘေးက ပတ်လို့ (Cutty Sark) ကတ်တီ ဆာခ်ကို ရောက်ခဲ့တယ်။ ကတ်တီဆာခ်ကလည်း ဂရင်းနစ်ရဲ့ ထင်ရှားတဲ့နေရာတစ်ခု။ ၁ဂ၆၉ ခုနှစ်မှာ တည်ဆောက်ခဲ့တဲ့ ကုန်သည်သင်္ဘောတစ်စင်း။ တရုတ်လက်ဖက်ခြောက် ကုန်သွယ်လမ်းကြောင်းမှာ ပြေးဆွဲခဲ့တယ်လို့ဆိုတယ်။ နောက်ပိုင်းမှာ အပြိုင်သင်္ဘော အဖြစ်လည်း အသုံးပြုခဲ့ပါတယ်တဲ့။ ကတ်တီဆာခ်မှာက အခြားသောသမိုင်းကြောင်းတွေနဲ့လည်း ပြည့်လျက်ပါ။ သူ့ခေတ်သူ့ခါက ဆိုလျှင်ဖြင့် အမြန်ဆုံးသင်္ဘောဖြစ်ပါတယ် တဲ့။ ၁၉ ရာစုခေတ်မှာ တည်ဆောက်ခဲ့တဲ့ သင်္ဘောတွေထဲမှာ တစ်စင်းတည်းသာ ကျန်တော့တဲ့သင်္ဘောလို့လည်း ဆိုပါတယ်။ သမိုင်းတန်ဖိုးကြီးမားတဲ့ ရတနာတစ်ခုပေါ့။ ကံဆိုးလှစွာပဲ၊ စနစ်တကျ ထိန်းသိမ်းစောင့်ရှောက်နေတဲ့ကြားကပဲ ၂ဝဝ၇ ခုနှစ် မေလ ၂၁ ရက်နေ့မှာ ကတ်တီဆာက်ဟာ မီးဘေးသင့်ခဲ့ရပါတယ်။
သစ်သားနဲ့ပြုလုပ်ထားတဲ့ အပိုင်းတော်တော်များများကတော့ မီးသင့်ရာမှာပါသွားတယ်လို့ ယူဆရပါတယ်။ မူလ ပြင်ဆင်နေဆဲအပေါ်မှာ မီးသင့်မှုကြောင့် အပိုကုန်ကျမှု ပေါင် ၅ သန်းကနေ ၁ဝ သန်းအထိ စရိတ်ပါ ထပ်ပေါင်းမယ်ဆိုလျှင်ဖြင့် ပေါင်သန်း ၃၅ ကနေ သန်း ၄ဝ အထိ ကုန်ကျမယ်လို့ ခန့်မှန်းပါတယ်တဲ့။ ခုတော့ ပြန်လည်ပြုပြင်နေဆဲမို့ ၁၉ ရာစုခေတ်ကျန် သမီးပျို ကတ်တီဆာက်ကို မမြင်တွေ့နိုင်ခဲ့ပါဘူး။ အမိုးအကာအောက်မှာ သူမရဲ့ဒဏ်ရာဒဏ်ချက်တွေကို ကုစားရင်း အနားယူနေလေရှာရဲ့။ ရှေးဟောင်း သင်္ဘောအိုငယ်တစ်စင်းအတွက် ခုလိုမီလျံ သန်းပေါင်းများစွာ အကုန်ကျခံကာ ပြန်လည်ပြင်ဆင်နေခြင်းဟာ သမိုင်းတန်ဖိုးနဲ့ အင်္ဂလိပ်ဂုဏ်သိက္ခာအတွက်ပဲ ဖြစ်မှာပါလို့ ဖြည့်ဆည်းပြီး တွေးထင်မိပါတယ်။ သမိုင်းဆိုတာ ဖျောက်ဖျက်ကောင်းတဲ့အရာမျိုးမှ မဟုတ်တာ။ ချစ်ခြင်း မုန်းခြင်း တရားတွေနဲ့ လိုသလို လှည့်စားပြောင်းလွှဲလို့ သင့်တော်တာမျိုးမှ မဟုတ်တာ။ သမိုင်းကိုတန်ဖိုးထားကာ ထိန်းသိမ်းတတ်ခြင်းဟာ အင်္ဂလိပ်တွေရဲ့ ချစ်စရာကောင်းတဲ့ အလေ့အလာတစ်ခုပါ။ ဒါမျိုးဆိုတာ အတုယူလေးစားစရာလည်းဖြစ်ပါတယ်။
ငယ်စဉ်က ကမ္ဘာ့သမိုင်းကိုသင်ယူခဲ့ရရာမှာ ဘာဖြစ်လို့ ခုလိုကောင်းမွန်တဲ့ အမူအကျင့်တွေကို သင်ယူခွင့် မရနိုင်ခဲ့တာလဲလို့လည်း စဉ်းစားမိပါသေးတယ်။ မကောင်းတာတွေကို ထောက်ပြဝေဖန်တတ်တဲ့ ကိုယ်တို့အနေနဲ့ ကောင်းတာတွေကို ဖော်ထုတ်ချီးကျူးမှုဘက်မှာ အလွန်ပဲအားနည်းနေသလားလို့လဲ တဆက်တည်း တွေးမိပါသေးတယ်။ အလေ့အကျင့်ကောင်းတွေဆိုတာက တဖြည်းဖြည်းပျိုးထောင်ပေးမှ ရှင်သန်ဖွံ့ထွားတတ်တာမျိုးပါ။ တကယ်တော့ ကိုယ်တို့ဆီမှာလည်း သက်ရှိသက်မဲ့ ဂုဏ်ပြုမှတ်တမ်းတင်ဖွယ်တွေ၊ မြတ်နိုးတန်ဖိုးထားကာ ထိန်းသိမ်းစောင့်ရှောက်ရမယ့် အရာတွေတော့ အများသားပါ။ သို့ပေမယ့် ကိုယ်တို့က ဒီဘက်မှာ သိသိသာသာပဲ အားနည်းလွန်းလှပါတယ်။ ရှေးကျလွန်းလို့ မှတ်တမ်းမရှိတဲ့အရာတွေအတွက် ပညာရှင်တွေက Prehistory လို့ ရေးထိုးကြတယ်။ တစ်နည်းဆိုရလျှင် မယဉ်ကျေးသေးတဲ့ခေတ်အခါလို့ ဆိုလိုရာလည်း ရောက်ပါတယ်။ ဒီတော့ မှတ်တမ်းတင်ရမည့်အရာကို မှတ်တမ်းပြုဖို့ ပျက်ကွက်နေသေးတဲ့ ကိုယ်တို့လူမျိုးတွေက Prehistory လူသားတွေများ ဖြစ်နေပြီလား။ သမိုင်းကို မလေးစားတတ်တဲ့ လူမျိုးဟာ ပစ္စုပ္ပန်ကို ဖန်တီးတည်ဆောက်ရာမှာ သိပ်ပြီးခွန်အားပြည့်လှမယ် မဟုတ်ဘူးရယ်လို့ ကိုယ်ကတော့ လေးနက်စွာပဲ ယုံကြည်နေမိတယ်။ ဒါဟာ ကိုယ့်ရဲ့ ကျဉ်းမြောင်းလှတဲ့ အတွေ့အကြုံကိုသာ အခြေခံတဲ့ ကောက်ချက်ပြုမှုလည်းပဲ ဖြစ်နိုင်ပါတယ်။ ဒါကို သင့်အနေနဲ့ လွတ်လပ်စွာ သဘောမတူနိုင်ခွင့်လည်း ရှိပါတယ်။
ကတ်တီဆာက်ဘေးမှာရှိတဲ့ ရင်ပြင်ကျယ်ပေါ်က ထိုင်ခုံလေးတွေပေါ်မှာ ခဏအနားယူကာ ထိုင်ခဲ့တယ်။ ရင်ပြင်ပေါ်နဲ့ ရင်ပြင်ဘေးတွေမှာတော့ ပင်လယ်ရေကြောင်းဆိုင်ရာ အထိမ်းအမှတ်သင်္ကေတ ရုပ်တုများကို ထုလုပ်ပြသထားလို့။ ဒီနေရာရပ်ဝန်းလေးဟာ နှစ်ပေါင်းကြာရှည်ကတည်းက တည်ရှိနေတဲ့နေရာလေးလို့ မပြောဘဲ သိသာနိုင်လောက်တဲ့ အနေအထားမျိုး ဖန်တီးထားသလိုထင်ရတယ်။ တကယ်တော့ ဒါတွေဟာ တကယ့်ကိုမှ နှစ်ပေါင်းကြာရှည်နေခဲ့တဲ့ အရာများသာ ဖြစ်တယ်။ နွမ်းညစ်ညစ် သစ်သားရင်ပြင်လေးပေါ်က ဆင်းလို့ ခရီးဆက်ဖို့ ဂရင်းနစ်မြို့လယ်ဆီကို ဦးတည်ခဲ့တယ်။
လမ်းပေါ်ကနေ စိန့်အဲလဖဲ့ဂ်ျ ဘုရားရှိခိုးကျောင်းကြီးကို နောက်ခံထားလို့ မှတ်တမ်းဓာတ်ပုံ ရိုက်ဖြစ်တယ်။ ခပ်ကျဉ်းကျဉ်းလမ်းကြားကနေ မြင်ရတဲ့မြင်ကွင်းမို့ ဘုရားရှိခိုးကျောင်းကြီးရဲ့ ကြီးမားတဲ့ ဘေးမြင်ကွင်းများကတော့ ဓာတ်ပုံထဲမှာ မပါဝင်နိုင်ဘူးပေါ့။ သို့ပေမယ့် လမ်းကျဉ်းကျဉ်းလေးထဲမှာ ပြေးသွားနေတဲ့ နှစ်ထပ်ဘတ်စ်ကားကြီးရယ်။ လမ်းထောင့်မှာရှိနေတဲ့ ဗြိတိန်ရဲ့ရှေးအကျဆုံး၊ နှစ်ပေါင်းအကြာရှည်ဆုံး ဘရောဝါးအဆောက်အဦကြီးကို နောက်ခံထားလို့ပေါ့။
အမှောင်ကျဖို့ တစစနီးလာတဲ့အချိန်။ ကောင်းကင်မှာလည်း ညိုမှောင်မှောင်တိမ်စတို့က မိုးစက်ပွင့်အလှတွေကို သွန်းချဖို့ တာစူနေသည့်အလား။ အုပ်ဆိုင်းကာ ဝိုင်းလို့လာလေပြီ။ သိမ်းမြစ်ကမ်းဘေး လမ်းလျှောက်သူတို့အတွက် စနစ်တကျဖောက်လုပ်ထားတဲ့ လမ်းလေးပေါ်မှာလည်း တစ်ယောက်စ နှစ်ယောက်စသာလျှင် တွေ့ရတော့တယ်။ သိမ်းမြစ်ပြင်ကနေ ဖြတ်တိုက်လာတဲ့ အေးမြမြလေပြည်လေးက မကြာမီ ကျရောက်လာတော့မယ့် မိုးသက်နံ့လေးတွေကို သယ်ဆောင်လို့ ရာဇဝင်ထဲက ပင်လယ်ဆိပ်ကမ်းငယ်တစ်ခုရဲ့ နေဝင်စအလှကို ကန့်လန့်ကာချဖို့ သက်ဝင်လှုပ်ရှားစ ညကို နိုးထစေခဲ့ပြီ။
တပြိုင်တည်းမှာပဲ အမှောင်ထုကိုဖြိုခွင်းဖို့ ဗစ်တိုးရီးယားခေတ်နွယ် ဓာတ်မီးတိုင်ဟောင်းများဆီကနေ ဝါကျင်ကျင် မီးရောင်စလေးတွေကလည်း လင်းလက်တောက်ပလာပြီပေါ့။ အနက်ရောင်အင်္ကျီရှည်ကြီးကိုဝတ်လို့ ခေါင်းမှာလည်း ၁၈ ရာစု ပင်လယ်ဓားပြ ဦးထုပ်ကြီးတစ်လုံးကိုဆောင်းကာ မျက်နှာတပြင်လုံး အမွေးတွေ ဖုံးအုပ်နေတဲ့ မုတ်ဆိတ်ရှည်ရှည် ကလန်ကလား အင်္ဂလိပ်အဘိုးအိုကြီးတစ်ယောက်က သူ့လိုပဲ ရုပ်ဆိုးဆိုးခွေးအိုကြီးတစ်ကောင်ကို လက်မှာဆွဲလို့ အမှောင်ကမ္ဘာထဲကနေ ရုတ်တရက်ပေါ်လာပြီး ကိုယ့်အနားကနေ ဖြတ်သွားလေရဲ့။ လူသူကင်းစ ဒီဆိပ်ကမ်းငယ်မှာ ဒီလူကြီးဘယ်ဆီကိုများ သွားနေတာပါလိမ့်။ ရာဇဝင်ထဲက တံငါရွာတစ်ခုဆီသို့များလား။
အမှောင်ရိပ်အောက်မှာ တဖြည်းဖြည်းကွယ်ပျောက်တော့မယ့် ဂရင်းနစ်မြို့လေးရဲ့အလှကို နှမြောတသစွာ ငေးရင်း ကိုယ်လာရာလမ်းဆီကို ပြန်ဖို့ ခြေလှမ်းစခဲ့တယ်။ ကိုယ့်ရင်တွင်းမြစ်ငယ်ပြင်မှာတော့ မကြာမီအချိန်ပိုင်းလေးများအတွင်းဆီကမှ တွေ့ခဲ့ရတဲ့ ဂရင်းနစ်ရဲ့ စွဲမက်ဖွယ်အလှ လှေငယ်လေးတွေက လှုပ်ရှားကာ ကူးခတ်နေဆဲ။ ဂရင်းနစ်ဆိုတာ ဘာလဲလို့ စကားတစ်ခွန်းနဲ့ပြောရလျှင်တော့ ဂရင်းနစ်ဆိုတာ ‘ကိုယ့်ကို ရှေးဟောင်းဒေသတစ်ခုကို တိတ်ဆိတ်စွာ ခေါ်ဆောင်သွားနိုင်ခဲ့တဲ့ ရာဇဝင်ပုံပြင်ဟောင်းထဲက မျက်လှည့်ဆရာတစ်ဦးရဲ့ ရွာငယ်လေးဖြစ်ပါတယ်’ ဆိုတဲ့ စကားပဲ ဖြစ်မှာပါ။
ဂရင်းနစ်က အပြန်လမ်းမှာတော့ လမ်းဘေးရှိ မီလီနီယံဒုန်း (The O2) အဆောက်အဦကြီးဆီကို ခဏဝင်ရောက် ကြည့်ရှုဖို့ ကားကိုဒုန်းဘက် ဦးတည်ခဲ့တယ်။ ဒီဒုန်းကြီးကလည်း အင်္ဂလန်ခေတ်သစ်သမိုင်းမှာ ငြင်းခုံစရာများစွာနဲ့ တည်ဆောက်ခဲ့ရတဲ့ အဆောက်အဦတစ်ခု။ ကမ္ဘာလှည့်ခရီးသွားတွေအတွက် ဆွဲဆောင်မှုတစ်ခုဖြစ်လာစေဖို့ ရည်ရွယ်ခဲ့ပေမယ့် မျှော်လင့်သလို မဖြစ်ခဲ့တာကြောင့် ငွေကြေးအခက်အခဲတွေနဲ့ ကြုံခဲ့တယ်လို့လည်း မှတ်သားရ။ ဂရင်းနစ်ရဲ့ သမိုင်းဝင်နယ်မြေမှာ ခေတ်သစ်ဗိသုကာလက်ရာတစ်ခုအဖြစ် မှတ်တမ်းတင်ရမည့် အဆောက်အဦးတစ်ခုဆိုတာ အဝေးကနေ မြင်ရုံနဲ့ သတိပြုမိလောက်တဲ့အရာပါ။ နောင်နှစ်ပေါင်းကြာလာတဲ့အခါမှာ သူလည်း အိမ်နီးနားချင်း သူငယ်ချင်းတွေလို ဂန္ထဝင် ဝင်လာဦးလေမလား။ သေချာတာကတော့ ၂ဝ၁၂ မှာပြုလုပ်မယ့် လန်ဒန်အိုလံပစ်ပွဲတော် ကျင်းပရာဒေသရဲ့ အစိတ်အပိုင်းတစ်ခုမို့ မီလီနီယံဒုန်းကြီးဟာ ကမ္ဘာသူကမ္ဘာသားများရဲ့ မြင်ကွင်းမှာ ထင်ရှားတဲ့ အမှတ်အသားတစ်ခုအနေ ပေါ်လာဦးမှာ မလွဲပါဘူး။
ဒုန်းကြီးရဲ့ဂိတ်ဝအထိရောက်ခဲ့ပေမယ့် ကားပတ်ကင်အတွင်း ဝင်ရောက်ခွင့် မရခဲ့။ ဒီညမှာ အမေရိကက ပေါ့ပ်အဆိုတော် ဘရစ်တနီစပီးယားရဲ့ ရှိုးရှိတဲ့အတွက် ကားပါကင်တွေကို ပိတ်ထားတာပါတဲ့။ ဒီလိုဆိုတော့ ဂရင်းနစ်ဆိုတဲ့ ဂန္ထဝင်ဒေသမှာ ဒီညအဖို့ မော်ဒန်အလှတွေနဲ့ ပြည့်လျှမ်းလို့ နေဦးမှာပေါ့။ ခေတ်ဟောင်းခေတ်သစ် မတူမှုနှစ်ခု ပေါင်းစပ်ထားတဲ့ လန်ဒန်ညက ဘယ်လိုပုံစံများ ဖြစ်လေမလဲ။ အင်း ... အတွေ့အကြုံကို အခြေခံလို့ စဉ်းစားဖို့ဆိုတာကလဲ ဒါမျိုးက ကိုယ့်ဘဝအခြေအနေနဲ့ဆို အလွန့်အလွန်မှ အလှန်းကွာဝေးလွန်းလှတဲ့ အရာမျိုးမို့ အမှန်ရဖို့ ဘယ်လိုမှ နီးစပ်နိုင်မယ် မဟုတ်ပေဘူးကလား။ ကဲ .. လာ .. ဒီမှာခဏ နားကြမယ်လေ။ ။
အရှင်ဉာဏိက
ဇွန်လ ၃ ရက်၊ ၂ဝဝ၉
0 comments:
Post a Comment